Պուտինը հայտարարել է, որ Հայաստանի՝ ԵՄ-ին մերձենալու որոշումը պետք է բխի հայ ժողովրդի շահերից

Ռուսաստանի նախագահ Վլադիմիր Պուտինը հայտարարել է, որ Հայաստանի՝ Եվրամիության հետ մերձենալու կամ այլ ուղղությամբ շարժվելու որոշումը պետք է կայացվի՝ ելնելով հայ ժողովրդի շահերից, և այդ որոշումը չի կարող փչացնել հայ-ռուսական հարաբերությունները։ «Արմենպրես»-ի հաղորդմամբ՝ մամուլի ասուլիսի ընթացքում Պուտինն ընդգծել է, որ ռուս և հայ ժողովուրդներին դարեր շարունակ կապել են բարեկամության և առանձնահատուկ հարաբերությունների ամուր կապեր։

«Ռուս և հայ ժողովուրդներին, առանց որևէ չափազանցության, դարեր շարունակ կապում են բարեկամության և առանձնահատուկ հարաբերությունների կապեր։ Ռուսաստանն ու Հայաստանը հատուկ հարաբերություններ ունեն։ Ես նրան (վարչապետ Նիկոլ Փաշինյանին-խմբ․) ասել եմ, որ այն ամենը, ինչ լավ է հայերի համար, ընդունելի և լավ է նաև Ռուսաստանի համար»,- ասել է ՌԴ նախագահը։

Նրա խոսքով՝ Հայաստանի իշխանություններն են պատասխանատու որոշումներ կայացնելու համար։

«Արեք այնպես, ինչպես ճիշտ եք համարում՝ ելնելով հայ ժողովրդի շահերից։ Դուք այժմ իշխանության եք, ձեր վրա է դրված որոշումներ ընդունելու պատասխանատվությունը։ Ինչպես որոշեք, այնպես էլ կլինի»,- նշել է Պուտինը։

Միևնույն ժամանակ նա ընդգծել է, որ խոսքը նախևառաջ տնտեսական հարցերի մասին է։

«Ինչ որոշում էլ կայացվի, դա չի փչացնի մեր հումանիտար կապերը, չի փչացնի մեր քաղաքական հարաբերությունները, սակայն այս դեպքում խոսքը զուտ տնտեսական բաղադրիչների մասին է։ Ամեն ինչ պետք է հաշվարկել, ուշադիր դիտարկել և հետո որոշում կայացնել»,- ասել է նա։

Պուտինը հիշեցրել է նաև, որ ժամանակին Ուկրաինայի ճգնաժամը սկսվել էր Եվրամիությանը միանալու փորձերի ֆոնին։

«Մենք դեմ չէինք, բայց ասում էինք՝ լսեք, օրինակ, ֆիտոսանիտարական նորմերը լիովին տարբեր են»,- նշել է ՌԴ նախագահը։

Նա հավելել է, որ այդ հարցի շուրջ բաց և անկեղծ քննարկում է ունեցել Հայաստանի փոխվարչապետ Մհեր Գրիգորյանի հետ։

«Ես նրան ասել եմ, որ այս հարցով մեր խոսակցությունը կարող է լինել միայն անկեղծ, միայն ազնիվ և ամբողջովին բաց։ Այսօր մեկի հետ մյուսը գործնականում համատեղել հնարավոր չէ։ Այդ պատճառով մենք ստիպված կլինենք, մեծ հաշվով, գրեթե ամբողջությամբ դադարեցնել Հայաստանի հետ տնտեսական ինտեգրացիոն գործընթացներին վերաբերող աշխատանքը»,- հայտարարել է Պուտինը։

ՌԴ նախագահը որպես ԵԱՏՄ անդամակցության առավելություններից մեկը նշել է էներգակիրների գները։

«Եվրոպայում գազի գինը շուրջ 600 եվրո է, իսկ Հայաստանի համար՝ շուրջ 150 եվրո։ Բայց սա միակ առավելությունը չէ»,- ասել է նա։

Պուտինի խոսքով՝ պետք է հաշվի առնել նաև ներդրումների հարցը։ Նա նշել է, որ եվրոպացի գործընկերները խոստացել են Հայաստանում ներդնել 2,5 միլիարդ եվրո, սակայն այդ ներդրումների իրականացման ժամկետներն ու մեխանիզմները դեռ հստակ չեն։

«2,5 միլիարդը, միևնույն է, պակաս է 4,9 միլիարդից, էլ չենք խոսում ռուսական կապիտալի անուղղակի ներդրումների մասին»,- ասել է ՌԴ նախագահը։

Նա նաև նշել է, որ ԵԱՏՄ-ից դուրս գտնվելու դեպքում Հայաստանի քաղաքացիների համար կարող են փոխվել Ռուսաստանում աշխատելու և սոցիալական ծառայություններից օգտվելու պայմանները։

«Դա կնշանակի, որ Ռուսաստանում աշխատելու համար պետք կլինի արտոնագիր ձեռք բերել, իսկ պարտադիր բժշկական ապահովագրության համակարգից օգտվելու համար անհրաժեշտ կլինի երկրում ապրել առնվազն հինգ տարի։ Եվ նման պահանջները շատ են։ Սա բոլորովին այլ իրավիճակ է։ Պարզապես պետք է այդ ամենի մասին խոսել հստակ, բաց և ազնիվ»,- եզրափակել է Պուտինը։