«Լուսավոր Հայաստան»-ը քարոզարշավ է անցկացրել Տավուշի մարզում

Ազգային ժողովի ընտրություններին մասնակցող «Լուսավոր Հայաստան» կուսակցությունը նախընտրական քարոզարշավի հերթական օրն անցկացրել է Տավուշի մարզի Այրում քաղաքում:

«Արմենպրես»-ի փոխանցմամբ՝ այս մասին տեսանյութ է հրապարակվել կուսակցության «Ֆեյսբուք»-ի էջում:

Կուսակցության նախագահ Էդմոն Մարուքյանը բնակիչների հետ հանդիպման ժամանակ պնդում է արել, թե իրենց կուսակցությունը միակն է, որի ընտրական ցուցակի առաջին տասնյակում Տավուշի մարզից թեկնածու կա։

«Տավուշի ժողովուրդը Ազգային ժողովում պետք է ունենա իր պատգամավորին»,-ասաց նա, հորդորելով տավուշցիներին ընտրել իրենց հող ու ջրից մեկին ու հենց նրանից էլ պահանջել խնդիրների բարձրաձայնում։

«Դուք եք որոշողը։ Կուսակցությունների կողմից իրական հարգանքը տվյալ տարածքի նկատմամբ արձանագրվում է ցուցակում ներգրավված մարդու տեղով, այլ տարբերակ չկա»,-հավելեց նա։

Մայիսի 8-ին մեկնարկել է հունիսի 7-ին Հայաստանում կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։

Ընտրություններին մասնակցելու համար գրանցվել է 18 քաղաքական ուժ՝ 2 դաշինք և 16 կուսակցություն։ «Լուսավոր Հայաստան» կուսակցությունը ընտրություններին մասնակցում է 19 համարի ներքո։ Կուսակցության կարգախոսն է՝ «Պաշտպանիր ինքնությունդ»։

Կուսակցությունը ԿԸՀ է ներկայացրել 89 թեկնածուից բաղկացած ընտրական ցուցակ, որը գլխավորում է կուսակցության նախագահ, ԱԺ նախկին պատգամավոր Էդմոն Մարուքյանը։