«Հայաստան» դաշինքը քարոզարշավ է իրականացրել Ախուրյանում

«Հայաստան» դաշինքի ներկայացուցիչները հունիսի 7-ին կայանալիք խորհրդարանական ընտրությունների նախընտրական քարոզարշավի շրջանակներում մայիսի 19-ին այցելել են Շիրակի մարզի Ախուրյան համայնք։

«Արմենպրես»-ի հաղորդմամբ՝  համայնքում քաղաքացիների հետ հանդիպմանը «Հայաստան» դաշինքի նախընտրական ցուցակի առաջին համար Ռոբերտ Քոչարյանն անդրադարձել է մարզերում գյուղատնտեսության զարգացմանը։

Նա նշել է, որ եթե մարզերը չզարգանան, երկիրը թուլանալու է։ «Մենք ամեն ինչ պետք է անենք, որ մարդիկ աշխատանքի հնարավորություն ունենան, որպեսզի կարողանան պահել իրենց ընտանիքները»,-ասել է Քոչարյանը։

ԱԺ «Հայաստան» խմբակցության պատգամավոր Իշխան Սաղաթելյանն էլ իր ելույթում ասել է, որ իրենք առաջին օրվանից քաղաքացիներին փոխանցում են մեկ բան, որ այս ընտրությունները հերթական և սովորական ընտրություններ չեն, դրանք մեր երկրի ճակատագրի հետագա ընթացքի համար ունեն շատ կարևոր նշանակություն։

«Հայաստան» դաշինքի ներկայացուցիչները Ռոբերտ Քոչարյանի գլխավորությամբ շրջել են Ախուրյանով, շփվել քաղաքացիների հետ, պատասխանել նրանց հուզող հարցերին։

Մայիսի 19-ին «Հայաստան» դաշինքի ներկայացուցիչների կանգառն են նաև Աշոցքը, Ամասիան և Գյումրին:

Մայիսի 8-ին մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրություններին մասնակցելու համար գրանցվել է 19 քաղաքական ուժ՝ 2 դաշինք և 17 կուսակցություն։ «Հայաստան» դաշինքը խորհրդարանական ընտրություններին մասնակցում է 17 համարի ներքո՝ «Միասին կարող ենք» կարգախոսով։ Դաշինքը ԿԸՀ է ներկայացրել 213 թեկնածուից բաղկացած ցուցակ և ազգային փոքրամասնությունների 4 թեկնածուից բաղկացած ցուցակ։

Դաշինքը 2026 թվականի խորհրդարանական ընտրությունների համար ներկայացրել է նաև իր նախընտրական հիմնական շեշտադրումները, որոնց թվում են բանակի և անվտանգության համակարգի ուժեղացումը, Ռուսաստանի հետ ռազմավարական հարաբերությունների պահպանումը, փոքր և միջին բիզնեսի աջակցությունը, գյուղատնտեսության ապահովագրության ներդրումը, էլեկտրաէներգիայի ցերեկային սակագնի իջեցումը, գույքահարկի բարձրացման մեղմացումը կամ չեղարկումը, համատարած հայտարարագրման համակարգի չեղարկումը, սոցիալական աջակցության ծրագրերի ընդլայնումը, ինչպես նաև բնապահպանական և ջրային ռեսուրսների կառավարման ծրագրերը։