Եվրոպոլում ՀՀ կապի սպա Արա Ֆիդանյանը մասնակցել է զենք-զինամթերքի հետագծման հարցերին նվիրված աշխատաժողովի

Եվրոպոլում Հայաստանի Հանրապետության կապի սպա Արա Ֆիդանյանը օրերս Պրահայում մասնակցել է Եվրոպական միության նախաձեռնությամբ իրականացվող EMPACT (Հանցավոր սպառնալիքների դեմ ուղղված եվրոպական բազմակողմ հարթակ) ծրագրի շրջանակում կազմակերպված՝ զենք-զինամթերքի հետագծման հարցերին նվիրված իրավապահ մարմինների և մասնավոր հատվածի ներկայացուցիչների առաջին համատեղ աշխատաժողովին։

Մասնակցում էին նաև Մեծ Բրիտանիայի, Նիդեռլանդների, Ֆրանսիայի, Պորտուգալիայի, Իսպանիայի, Բելգիայի, Բոսնիա և Հերցեգովինայի, Չեխիայի, Մալթայի, Կոսովոյի և Շվեյցարիայի իրավապահ մարմինների ներկայացուցիչներ։

 «Արմենպրես»-ի փոխանցմամբ՝ ՀՀ ՆԳՆ-ից հայտնում են, որ աշխատաժողովի ընթացքում քննարկվել է քաղաքացիական նշանակության փամփուշտների հետագծման անհրաժեշտությունը՝ հրազենի կիրառմամբ կատարվող հանցագործությունների բացահայտման և զենք-զինամթերքի ապօրինի շրջանառության կանխարգելման նպատակով։

Դիտարկվել են նաև փամփուշտների հետագծելիությունն ապահովելու համար դրանց նշագրման տեխնիկական հնարավորությունները։ Աշխատաժողովի շրջանակում մասնակիցներն այցելել են զենք-զինամթերքի արտադրության ոլորտում համաշխարհային ճանաչում ունեցող «Sellier & Bellot» և «CZ» (Česká zbrojovka) գործարաններ՝ տեղում ծանոթանալու արտադրական գործընթացներին և կիրառվող նշագրման տեխնոլոգիաներին։