Էկոնոմիկայի նախարարությունը ներկայացրել է «Վայլդբերրիզ»-ում ապրանքների վաճառքի համար պահանջվող փաստաթղթերի նոր կարգը
2 րոպեի ընթերցում
Էկոնոմիկայի նախարարությունը տեղեկացրել է, որ այսուհետ «Վայլդբերրիզ» էլեկտրոնային առևտրային հարթակի միջոցով Հայաստանում և ԵԱՏՄ անդամ երկրներում արտադրված ապրանքների վաճառքի համար անհրաժեշտ է ունենալ ծագման սերտիֆիկատ։ «Արմենպրես»-ի հաղորդմամբ՝ նախարարությունը նշել է, որ փաստաթուղթը հնարավոր է ձեռք բերել ՀՀ առևտրաարդյուբերական պալատում։
Գերատեսչության պարզաբանմամբ՝ սերտիֆիկացման ենթակա ապրանքների դեպքում անհրաժեշտ են նաև համապատասխանության սերտիֆիկատ և որակի հայտարարագիր, որոնք կարելի է ստանալ համապատասխան սերտիֆիկացման մարմիններից։
Այլ ապրանքների դեպքում, բացի ծագման սերտիֆիկատից, կարող են օգտագործվել նաև ապրանքի ծագումը հաստատող այլ փաստաթղթեր՝ հաշիվ-ապրանքագիր (invoice), լուսանկարներ, օգտագործման հրահանգ, ապրանքի նկարագրություն կամ այլ հիմնավորող փաստաթղթեր։
ԵԱՏՄ-ից դուրս արտադրված ապրանքների համար պահանջվում է մաքսային հայտարարագիր։
Էկոնոմիկայի նախարարությունը նաև կոչ է արել գործարարներին նախապես սկսել անհրաժեշտ փաստաթղթերի հավաքագրումը՝ գործընթացը սահուն կազմակերպելու համար։
Փաստաթղթերի հետ կապված հարցերի դեպքում վաճառողները կարող են դիմել «Վայլդբերրիզ»-ի տեխնիկական սպասարկման կենտրոն՝ վաճառողների պորտալի միջոցով։