Մենք կամք ենք դրսևորել՝ չշարունակելու Ղարաբաղյան շարժումը և Հայաստանը հասցրել ենք խաղաղ հանգրվանի. ՀՀ վարչապետ
2 րոպեի ընթերցում
Հայաստանի Հանրապետության վարչապետ Նիկոլ Փաշինյանի խոսքով՝ Ղարաբաղյան շարժումն ընդամենը լծակ էր Հայաստանի Հանրապետության կայացումը թույլ չտալու համար։ «Արմենպրես»-ի հաղորդմամբ՝ ՀՀ վարչապետ, «Քաղաքացիական պայմանագիր» կուսակցության վարչության նախագահ Նիկոլ Փաշինյանն այդ մասին հայտարարեց ՔՊ կուսակցության 8-րդ արտահերթ համաժողովում։
«Մենք կամք են դրսևորել՝ չշարունակելու Ղարաբաղյան շարժումը, որովհետև մենք, ի վերջո, այս ծանր ճանապարհն անցնելով՝ արձանագրել ենք, որ Ղարաբաղյան շարժումն ու մեր պատմության շատ էջեր թվում է, թե նպաստավոր են մեր ժողովրդի համար, բայց իրականում, ինչպես մեր պատմագրությունն է արձանագրել, դրանք ընդամենը աշխարհաքաղաքական թակարդներ էին, որոնք, հայտնի է, թե ինչ ամփոփում և ավարտ են ունեցել»,- ասաց Փաշինյանը։
Նրա պնդմամբ՝ շատ կարևոր է հոգեբանական և սոցիալ-քաղաքական առումով չչքմեղանալ և ուժ ունենալ պաշտպանելու սեփական որոշումը։
«Բոլոր նրանց, ովքեր պնդում են, որ Ղարաբաղը մերն էր, բայց այլևս մերը չէ, պետք է հստակ հակադարձենք, որ իրականությունն այլ է։ Հայաստանի Հանրապետությունը մերը չէր, բայց այլևս մերն է, որովհետև Ղարաբաղի շարժումն ընդամենը լծակ էր Հայաստանի Հանրապետության կայացումը թույլ չտալու համար։ Հայաստանում գործող, և առնվազն մեր կուսակցությունում ակտիվ քաղաքական գործիչների զգալի մասը ծագում է հենց ղարաբաղյան շարժումից, բայց հենց այստեղ է առաջնորդության առանձնահատկությունը, երբ դու կարողանում ես ինքնահայեցողության, ինքնաքննադատության պատմական և աշխարհաքաղաքական համատեքստերը հասկանալով՝ քո առաջնորդոуթյանը վստահված պետությունն ու ժողովրդին դուրս բերել աշխարհաքաղաքական թակարդներից։ Մենք Հայաստանը դուրս ենք բերել աշխարհաքաղաքական թակարդից և, ինչպես խոստացել էինք ժողովրդին, Հայաստանը հասցրել ենք խաղաղ հանգրվանի»,- նշեց Փաշինյանը։