365.93
Էրդողանը հեռախոսազրույց է անցկացրել Փեզեշքիանի հետ
2 րոպեի ընթերցում
Թուրքիայի նախագահ Ռեջեփ Թայիփ Էրդողանը հեռախոսազրույց է անցկացրել Իրանի նախագահ Մասուդ Փեզեշքիանի հետ։
Ինչպես հաղորդում է «Արմենպրես»-ը, այդ մասին հայտնում է Anadolu լրատվական գործակալությունը։
Թուրքիայի նախագահի վարչակազմի հաղորդակցության վարչության տարածած հայտարարության համաձայն՝ հեռախոսազրույցը տեղի է ունեցել Իրանի նախագահի նախաձեռնությամբ։
Զրույցի ընթացքում Էրդողանը նշել է, որ անհրաժեշտ է ստեղծել դիվանագիտական գործընթացների զարգացման հնարավորություններ՝ ընդգծելով, որ Թուրքիան շարունակում է ջանքեր գործադրել այդ ուղղությամբ։
Թուրքիայի նախագահը նաև հայտարարել է, որ Իրանի ներքին գործերին միջամտությունները անօրինական է համարում։ Միևնույն ժամանակ Էրդողանը նշել է, որ Իրանի կողմից տարածաշրջանի երկրների նկատմամբ ուղղված գործողությունները որևէ կողմի համար օգտակար չեն և պետք է դադարեցվեն։
Թուրքիայի նախագահը ընդգծել է, որ Թուրքիան տուժում է այն հակամարտություններից, որոնցում անմիջականորեն ներգրավված չէ։ Նրա խոսքով՝ անկախ պատճառներից, Թուրքիայի օդային տարածքի խախտումը չի կարող արդարացվել, և Անկարան կշարունակի ձեռնարկել անհրաժեշտ բոլոր միջոցները նման դեպքերին հակազդելու համար։
Էրդողանը նաև վշտակցություն է հայտնել Մենաբ քաղաքում դպրոցին հասցված հարվածի հետևանքով զոհերի առնչությամբ։
Նա նաև հույս է հայտնել, որ Մոջթաբա Խամենեիի ընտրվելը Իրանի հոգևոր առաջնորդի պաշտոնում կարող է նպաստել տարածաշրջանում խաղաղության հաստատմանը։
Իրանի նախագահ Մասուդ Փեզեշքիանն իր հերթին հայտարարել է, որ Թուրքիայի օդային տարածք հասած հրթիռները չեն արձակվել Իրանի տարածքից։ Նրա խոսքով՝ միջադեպի վերաբերյալ կանցկացվի համակողմանի հետաքննություն։
Բաժանորդագրվեք մեր ալիքին Telegram-ում