ՀՀ-ում Բուլղարիայի դեսպանը գործադրում է բոլոր ջանքերը երկկողմ կապերի ընդլայնման և ամրապնդման ուղղությամբ

Հանրապետության նախագահ Վահագն Խաչատուրյանն Ազգային տոնի կապակցությամբ ընդունել է Հայաստանի Հանրապետությունում Բուլղարիայի արտակարգ և լիազոր դեսպան Նիկոլա Նիկոլովին։ Այդ մասին տեղեկացնում է «Արմենպրես»-ը՝ վկայակոչելով ՀՀ նախագահի աշխատակազմի կողմից տարածված ֆեյսբուքյան գրառումը։

Նախագահ Խաչատուրյանը շնորհավորել է բարեկամ Բուլղարիայի ժողովրդին, երկրի ղեկավարությանը և դեսպանին՝ մաղթելով բարօրություն և շարունակական հաջողություններ։

Շնորհակալություն հայտնելով ընդունելության, շնորհավորանքի և բարեմաղթանքների համար՝ դեսպանը նշել է, որ իր համար մեծ պատիվ է հյուրընկալվել նախագահի նստավայրում։

«Հայաստանն ու Բուլղարիան ունեն դարավոր պատմական, մշակութային և հոգևոր ամուր կապեր»,- նշել է դեսպանը՝ հավելելով, որ գործադրում է բոլոր ջանքերը երկկողմ կապերի ընդլայնման և ամրապնդման ուղղությամբ։