2 րոպեի ընթերցում
Ուրուգվայում Հայաստանի Հանրապետության դեսպանատանը տեղի է ունեցել «Հայաստանը՝ պարտադիր այցելելու վայր» խորագրով միջոցառում, որի ընթացքում Ուրուգվայի խոշոր և ճանաչված զբոսաշրջային գործակալություններից մեկը՝ Hiperviajes-ը, հայտարարել է Հայաստանը՝ որպես նոր և հեռանկարային զբոսաշրջային ուղղություն, իր առաջարկների ցանկում ներառելու մասին։
«Արմենպրես»-ի հաղորդմամբ՝ այս մասին նշված է Ուրուգվայում ՀՀ դեսպանության տարածած հաղորդագրության մեջ։
Նշվում է, որ միջոցառման ընթացքում Ուրուգվայում ՀՀ դեսպան Մարիամ Գևորգյանն իր խոսքում անդրադարձել է Հայաստանի զբոսաշրջային ոլորտի արձանագրած առաջընթացին, կառավարության կողմից իրականացվող ռազմավարությանը և բարեփոխումներին, ինչպես նաև՝ երկրի հարուստ մշակութային ժառանգությանը, բնական գեղեցկություններին և բազմազան զբոսաշրջային հնարավորություններին։
ՀՀ դեսպանն ընդգծել է, որ Հայաստանը, լինելով պատմամշակութային արժեքներով հարուստ, անվտանգ և զարգացած ենթակառուցվածքներով երկիր, առաջացնում է աճող հետաքրքրություն միջազգային զբոսաշրջիկների շրջանում՝ ներկայացնելով նաև վերջին տարիների վիճակագրական տվյալները:
Հաղորդվում է, որ միջոցառման ընթացքում ելույթներով հանդես են եկել նաև Hiperviajes ընկերության գործադիր տնօրեն Ֆերնանդո Ռիվասը, կորպորատիվ ղեկավար Անդրեա Բեժոլիոն և վաճառքի պատասխանատու Էուխենիա Կալվետտեն՝ ներկայացնելով Հայաստան այցելության հնարավորությունները, առաջարկվող երթուղիները և տարվա բոլոր եղանակների համար նախատեսված զբոսաշրջային առաջարկները։
Միջոցառմանը ներկա են գտնվել Ուրուգվայի Զբոսաշրջության նախարարության, Զբոսաշրջային գործակալությունների ասոցիացիայի և զբոսաշրջային ոլորտի երկու տասնյակից ավելի ընկերությունների, ԶԼՄ-ների ներկայացուցիչներ, ինչպես նաև՝ սենատոր, Զբոսաշրջության նախկին նախարար Լիլիամ Կեչիչյանը:
Միջոցառման ավարտին տեղի է ունեցել հայկական ուտեստների հյուրասիրություն։