2 րոպեի ընթերցում
Հայաստանում 2025 թվականին հայրենադարձության միտումները եղել են բնականոն։ «Արմենպրես»-ի մամուլի սրահում հրավիրված ասուլիսում ՀՀ սփյուռքի գործերի գլխավոր հանձնակատարի գրասենյակի ղեկավար Զարեհ Սինանյանը նշեց, որ նախորդ տարի, «թեժ կետեր»-ով պայմանավորված, հայրենադարձության մեծ ալիք չի եղել, ինչպես նաև հոսքը նկատելի չի էլ պակասել։
«Վերջին տարիներին ամենամեծ աճը եղել է 2022-2023 թվականներին՝ կապված ռուս-ուկրաինական առճակատման հետ։ Նախորդ տարի էլ հիմնականում հայրենադարձվում էին Ռուսաստանից։ Դա բնական է, որովհետև այնտեղ մեծ թվով հայեր են ապրում։ Դրանից բացի, իրենք մոտ են թե աշխարհագրորեն, թե հոգեբանորեն, թե ծագումնաբանորեն։ Հայրենդարձների հաջորդ խումբը Սիրիայից է, այնուհետև Լիբանանից, Իրանից։ Հայրենադարձներ ունենք նաև ԱՄՆ-ից, Արգենտինայից, Ավստրալիայից և այլ երկրներից»,-ասաց Զարեհ Սինանյանը։
Հայրենադարձության և ինտեգրման կենտրոնը շարունակում է զարգացնել իր ծրագրերը, դրանք դարձնել թիրախային, սպասարկել այն մարդկանց, որոնք տեղափոխվում են Հայաստան։ Ծառայություններն ամենատարբեր բնույթի են՝ փաստաթղթեր, երեխաներին դպրոցներում, մանկապարտեզներում տեղավորում, հայոց լեզվի դասընթացներ, ծանոթություն աշխատաշուկային և այլն։
«Անհրաժեշտ է, որ հայրենադարձությունը լինի ավելի մասշտաբային, որովհետև մենք ունենք ժողովրդագրական խնդիր։ Այդ մասշտաբայինը կապված է մի քանի գործոնների հետ, որոնցից մեկը ֆինանսական միջոցների հատկացումն է։ Չեմ կասկածում, որ ինչ-որ փուլի գալու ենք դրան։ Երբ մեր անվտանգային թեժ հարցերը նվազագույն լուծում ստանան, ապա ուշադրությունը կսևեռենք այն հարցի վրա, որ հայրենադարձության միջոցով ժողովրդագրական պատկերը փոխենք»,-ասաց Զարեհ Սինանյանը։