Մալայզիան և Ինդոնեզիան արգելափակել են Իլոն Մասկի Grok արհեստական բանականության գործիքի հասանելիությունը
2 րոպեի ընթերցում
Մալայզիան և Ինդոնեզիան արգելափակել են ամերիկացի միլիարդատեր Իլոն Մասկի ստեղծած արհեստական բանականության չաթբոտի՝ Grok-ի հասանելիությունը՝ սեռական բնույթի դիփֆեյքեր ստեղծելու դրա ունակության պատճառով։ Ինչպես հաղորդում է «Արմենպրես»-ը, այս մասին հայտնում է BBC-ն՝ նշելով, որ այդպիսով այս երկրները դարձել են առաջինն աշխարհում, որ արգելել են Grok-ը։
Մասկին պատկանող X սոցիալական ցանցում գործող Grok-ը թույլ է տալիս օգտատերերին պատկերներ ստեղծել։ Վերջին շաբաթներին, սակայն, այն օգտագործվել է իրական մարդկանց պատկերները խմբագրելու ու նրանց անպարկեշտ կերպով ցույց տալու համար։
Հարավարևելյան Ասիայի երկրները հայտարարել են, որ Grok-ը կարող է օգտագործվել կանանց և երեխաների մասնակցությամբ պոռնոգրաֆիկ պատկերներ ստեղծելու համար։
Մալայզիայի և Ինդոնեզիայի կապի նախարարություններն առանձին հայտարարություններով են հանդես եկել։ Մասնավորապես, Մալայզիայի կապի և մուլտիմեդիայի հանձնաժողովը հունվարի 11-ին հայտարարել է, որ Grok-ի կողմից վնասակար բովանդակություն ստեղծելու հարցով տարվա սկզբին X-ին ծանուցումներ է ուղարկել։ Սակայն X-ը չի կարողացել պատշաճ պատասխան ներկայացնել, ինչի արդյունքում որոշում է կայացվել արգելափակել Grok-ը՝ մինչև արդյունավետ պաշտպանության միջոցների ներդրումը։
Ինդոնեզիայի կապի և թվային հարցերի նախարար Մեուտյա Հաֆիդը Instagram-ում արված գրառման մեջ հայտարարել է, որ Grok-ի օգտագործումը սեռական բնույթի բովանդակություն ստեղծելու համար մարդու իրավունքների, արժանապատվության և առցանց անվտանգության խախտում է։ Նախարարությունը խնդրել է Մասկին պատկանող X-ին պարզաբանում տրամադրել Grok-ի օգտագործման վերաբերյալ։
Ավելի վաղ Մասկը հայտարարել էր, որ իր հարթակի քննադատները փնտրում են «ցանկացած արդարացում գրաքննության համար»։