Թաիլանդի պաշտպանության նախարարը երրորդ երկրներին կոչ է արել չմիջամտել Կամբոջայի հետ հակամարտությանը
2 րոպեի ընթերցում
Թաիլանդի և Կամբոջայի միջև սահմանային հակամարտության կարգավորումը չի պահանջում երրորդ երկրների մասնակցություն: «Արմենպրես»-ի փոխանցմամբ՝ այս մասին հաղորդել է The Nation թերթը՝ վկայակոչելով Թաիլանդի պաշտպանության նախարար Նաթափոն Նարքփանիթին։
Նրա խոսքով՝ սահմանային վեճը Բանգկոկի և Պնոմպենի երկկողմ հարցն է և չի պահանջում երրորդ կողմերի, ներառյալ ԱՄՆ-ի կամ Չինաստանի միջամտությունը։
Դեկտեմբերի 7-ին կամբոջա-թաիլանդական սահմանի երկայնքով տեղի են ունեցել զինված բախումներ՝ հրազենի կիրառմամբ։ Թաիլանդի թագավորական բանակը հայտնել է, որ կամբոջական ուժերը վաղ առավոտյան սկսել են հրետակոծել թաիլանդական դիրքերը սահմանային գոտում։ Թաիլանդի ռազմաօդային ուժերն ի պատասխան գրոհել են Կամբոջայի ռազմական ենթակառուցվածքների վրա։
Կողմերը մարտերի վերսկսման համար մեղադրում են իրար։ Տեղեկություններ են հաղորդվել զինվորականների և խաղաղ բնակիչների շրջանում զոհերի մասին:
Թաիլանդի և Կամբոջայի միջև հակամարտության պատճառը սահմանային վիճելի տարածքներն են։
Հուլիսին կողմերի միջև հնգօրյա մարտական գործողություններն ավարտվեցին ԱՄՆ նախագահ Դոնալդ Թրամփի առաջարկած հրադադարով։ Այն կնքվել էր Մալայզիայի միջնորդությամբ և իրականացվել Թրամփի ճնշման շնորհիվ, որը սպառնում էր հրադադարի չհամաձայնելու դեպքում զրկել երկրներին առևտրային արտոնություններից։ Հրադադարի համաձայնությունը պաշտոնապես ստորագրվեց հոկտեմբերին՝ Մալայզիայում ԱՍԵԱՆ-ի գագաթնաժողովի ժամանակ, որին մասնակցում էր նաև Թրամփը։