Ադրբեջանն ակնկալում է Հայաստանի հետ խաղաղության համաձայնագիր ստորագրել 2026 թվականին
2 րոպեի ընթերցում
Ադրբեջանն ակնկալում է, որ Հայաստանի հետ խաղաղության համաձայնագրի ստորագրումը տեղի կունենա 2026 թվականին։ «Արմենպրես»-ի փոխանցմամբ՝ այս մասին Ժնևում լրագրողների հետ զրույցում ասել է Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը:
«Սա պատմական տարի է. 30 տարվա հակամարտությունը վերջապես ավարտվեց, և մենք մոտ ենք խաղաղության ձևակերպմանը: Վաշինգտոնում օգոստոսյան գագաթնաժողովը թույլ տվեց հաստատել երկու կողմերի մտադրությունը՝ հավատարիմ մնալ խաղաղության համաձայնագրին, բոլոր երկրների համատեղ ցանկությունը՝ շրջել էջը և տարածաշրջանային զարգացման նոր գլուխ սկսել: Մենք վերջնականացրել ենք խաղաղության համաձայնագիրը: Հաջորդ տարին նույնպես կարևոր է. մենք հույս ունենք պաշտոնականացնել խաղաղության համաձայնագիրը Հայաստանի հետ», - պաշտոնյայի խոսքերն է մեջբերում «ՌԻԱ Նովոստի» գործակալությունը:
Իր հերթին Ադրբեջանի արտգործնախարարը Վիեննայում անցկացվող ԵԱՀԿ նախարարական խորհրդի 32-րդ նիստում հայտարարել էր, որ Հայաստանը և Ադրբեջանը ներկայում գտնվում են երկկողմ հարաբերությունների ամենախաղաղ և կայուն փուլում։