ԵՄ հանձնակատարն առաջարկել է ստեղծել կապակցվածության հարցերով Հայաստան-Ադրբեջան-Թուրքիա-Եվրամիություն ձևաչափ
1 րոպեի ընթերցում
Եվրամիության ընդլայնման հարցերով հանձնակատար Մարթա Կոսն առաջարկել է ստեղծել տրանսպորտային կապակցվածության հարցերով Հայաստան-Ադրբեջան-Թուրքիա-Եվրամիություն քառակողմ ձևաչափ: «Արմենպրես»-ի թղթակցի փոխանցմամբ՝ այս մասին Կոսը հայտարարեց ՀՀ արտաքին գործերի նախարար Արարատ Միրզոյանի և ԵՄ ԱԳԱՔ բարձր ներկայացուցիչ Կայա Կալասի հետ համատեղ ասուլիսի ընթացքում:
«Հոկտեմբերին ենք սկսել քննարկումները։ Ես խնդրել եմ, որ նախարարն այսօր մեզ ներկայացնի տրանսպորտային կապակցվածության օրակարգում Հայաստանի առաջնահերթությունները, հետո միասին կքննարկենք»,- ասաց Մարթա Կոսը:
ԵՄ հանձնակատարը նշեց՝ բազմաթիվ քայլեր կարող են ձեռնարկվել կապակցվածության օրակարգով, բայց դա հնարավոր է միայն խաղաղության պայմաններում:
Բրյուսելում ընթանում է ՀՀ-ԵՄ գործընկերության խորհրդի 6-րդ հանդիպումը: Գործընկերության խորհրդի նիստի արդյունքներով՝ Հայաստանն ու Եվրամիությունը ստորագրել են գործընկերության ռազմավարական օրակարգը։ Փաստաթուղթը ստորագրել են Հայաստանի արտաքին գործերի նախարար Արարատ Միրզոյանը և Եվրամիության արտաքին գործերի և անվտանգության քաղաքականության հարցերով բարձր հանձնակատար Կայա Կալասը։