Վարչապետը «նախկին-ներկա» բանավեճերի, քննարկումների տրամաբանությունից դուրս գալու անհրաժեշտություն է տեսնում
2 րոպեի ընթերցում
Հայաստանի վարչապետ Նիկոլ Փաշինյանն այն կարծիքին է, որ պետք է դուրս գալ «նախկին-ներկա» բանավեճերի, քննարկումների տրամաբանությունից և հաստատել քաղաքական կյանքի նորմալ կանոններ:
«Արմենպրես»-ի հաղորդմամբ՝ Փաշինյանն այդ մասին ասաց Կառավարության նիստից հետո լրագրողների հետ զրույցում:
«2026 թվականի խորհրդարանական ընտրությունները պետք է լինեն հետևյալի դրսևորումը՝ նախորդող շրջանի քաղաքական էլիտայի բոլոր ներկայացուցիչները, որոնք Հայաստանն առաջնորդել ու տարել են դեպի թակարդ ու պահել են թակարդում, ընտրությունների արդյունքում պետք է դուրս մղվեն և այլևս քաղաքական դաշտում տեղ չունենան: Սա իմ կարծիքն է, և ես համոզված եմ, որ այդպես էլ տեղի կունենա»,-ասաց Փաշինյանը:
Նա նշեց՝ մարդկանց հետ շփվում է, գիտի, որ մարդիկ արդեն զզվել են այդ «նախկին-ներկա» բանավեճերից, քննարկումներից: Այդ խոսակցությունները հաճախ դուրս են գալիս քաղաքական բարեկրթության տրամաբանությունից:
«Նաև կուսակցության ֆորմատով ենք քննարկում ունենում, որ մենք պետք է, այնուամենայնիվ, արդեն դուրս գանք այս տրամաբանությունից, և քաղաքական կյանքի նորմալ կանոններ պետք է հաստատվեն Հայաստանում, որտեղ հայհոյախոսությունն ընդհանրապես տեղ չունի՝ առավել ևս քաղաքական քննարկումների բովանդակության մեջ»,-նշեց նա:
Փաշինյանը նկատեց՝ իրեն ևս կարող են մեղադրել դրանով զբաղվելու մեջ: «Ճիշտ կասեք: Դրա համար ես կիրակի օրերին գնում ու խորանի առաջ ծնկի եմ գալիս ու իմ մեղքերի համար թողություն եմ խնդրում»,-ասաց վարչապետը: