3 րոպեի ընթերցում
Սերբիայի վարչապետ Ջուրո Մացուտը հայտարարել է, որ Բելգրադը կատարել է Եվրոպական միության անդամակցության պայմանների չափանիշների 65%-ը, իսկ պահանջների ևս 20-30%-ը հիմնականում վերաբերում է Բրյուսելի կողմից Ռուսաստանի Դաշնության և այլ երկրների դեմ պատժամիջոցների քաղաքականությանը։
«Արմենպրես»-ի հաղորդմամբ՝ այս մասին հայտնում է սերբական Tanjug լրատվական գործակալությունը՝ վկայակոչելով երկրի վարչապետի հայտարարությունները։
«Մենք կատարել ենք ԵՄ-ին անդամակցելու պայմանների 65%-ը, բայց որոշ երկրներում այդ տոկոսը ավելի բարձր է։ Իսկ չափանիշների մնացած 20-30%-ը վերաբերում է երրորդ երկրների նկատմամբ քաղաքականությանը և պատժամիջոցներին։ Մեկ երկրի և մեկ իրավիճակի հետ կապված քաղաքական բաղադրիչը աննախադեպ չափով աճում է, իսկ մեր ձեռք բերած 65%-ը կրճատվում է։ Իսկ ի՞նչ կլինի, եթե Ռուսաստանի և Ուկրաինայի միջև պատմական համաձայնագիր կնքվի։ Ի՞նչ կանենք այդ դեպքում։ Արդյոք պահանջների այդ 20-30%-ը կվերանա մեզ համար»,-հայտարարել է Մացուտը։
Սերբիայի վարչապետը հավելել է, որ Ռուսաստանն ավանդական բարեկամ է, որը պաշտպանում և հասկանում է Սերբիայի իրավիճակը, քանի որ վերջին մի քանի տասնամյակների ընթացքում Ռուսաստանը անցել է որոշակի քայքայման և կառուցվածքային փոփոխությունների շրջաններով։
«Նրանք, անշուշտ, հասկանում են մեր իրավիճակը, ինչպես նաև ՄԱԿ-ի Անվտանգության խորհրդի մյուս անդամները։ Կարծում եմ, որ մենք պետք է հավասարակշռված մոտեցում ունենանք Արևելքի և Արևմուտքի նկատմամբ։ Մենք ավելի սերտորեն կապված ենք Արևմուտքի հետ, դա բացարձակապես պարզ է, բայց մենք չենք կարող մոռանալ նաև Արևելքի մասին»,-նշել է Սերբիայի վարչապետը։
Արևմտյան Բալկանների հինգ երկրներ՝ Ալբանիան, Բոսնիա և Հերցեգովինան, Հյուսիսային Մակեդոնիան, Չեռնոգորիան և Սերբիան ունեն ԵՄ անդամակցության պաշտոնական թեկնածուի կարգավիճակ։ Կոսովոն նույնպես դիմել է։ Թեկնածուի կարգավիճակ ստանալը ԵՄ անդամակցության երկարատև գործընթացի միայն սկիզբն է․ Թուրքիան թեկնածու է 1999 թվականից, Հյուսիսային Մակեդոնիան՝ 2005 թվականից, Չեռնոգորիան՝ 2010 թվականից, իսկ Սերբիան՝ 2012 թվականից։ Խորվաթիան վերջինն էր, որ միացավ ԵՄ-ին՝ միանալով 2013 թվականին։