ԱՄԷ-ն հետաքրքրված է տարբեր ոլորտներում Հայաստանի հետ համագործակցությունը խորացնելու հեռանկարով. Աբդուլազիզ Ալշեհիի
2 րոպեի ընթերցում
Աբու Դաբիի TRENDS Research and Advisory կենտրոնի ավագ հետազոտող, հետազոտական բաժնի ղեկավարի տեղակալ Աբդուլազիզ Ալշեհիին կարծում է, որ կան բազմաթիվ ոլորտներ, որոնց ուղղությամբ Արաբական Միացյալ Էմիրությունները ցանկանում է խորացնել համագործակցությունը Հայաստանի հետ։
Ռազմավարական և քաղաքական ուսումնասիրությունների ոլորտի փորձագետն այս մասին նշել է «Օրբելի ֆորում. կառուցելով խաղաղություն և բազմակողմանի համագործակցություն» խորագիրը կրող միջազգային երկօրյա համաժողովի շրջանակներում «Արմենպրես»-ի թղթակցի հետ զրույցում՝ գնահատելով Հայաստանի և Արաբական Միացյալ Էմիրությունների միջև առկա հարաբերությունների մակարդակը։
Փորձագետի բնորոշմամբ՝ Հայաստանի և Արաբական Միացյալ Էմիրությունների հարաբերությունների մակարդակն, անկասկած, մեծ աճ է գրանցել վերջին մի քանի տարիների ընթացքում, և միայն տնտեսական ոլորտում, օրինակ, 2023 թվականին ԱՄԷ-ի և Հայաստանի միջև առևտրային հարաբերությունների ցուցանիշները քառապատկվել են, ինչը ցույց է տալիս երկրների համատեղ բարեկամության, համատեղ հարաբերությունների նկատմամբ նվիրվածության մակարդակը։
«ԱՄԷ-ն Հայաստանը դիտարկում է որպես Հարավային Կովկասի տարածաշրջանի կարևորագույն վայր։ Մենք կարծում ենք, որ այն կարող է լինել ավելին, քան պարզապես տարանցիկ երկիրն է․ այն նաև մշակույթների խաչմերուկ է։ Եվ այդ պատճառով մենք գնահատում ենք բարեկամությունը Հայաստանի հետ»,-շեշտել է Աբդուլազիզ Ալշեհիին։
Անդրադառնալով հարցին, թե մասնավորապես ո՞ր ոլորտներում է, որ երկու երկրները կարող են գործընկերության ավելի մեծ նվաճումներ գրանցել՝ փորձագետը նշել է, որ այդ ոլորտներից կարող է լինել կանաչ էներգիան։ Զրուցակցի խոսքով՝ դա կարող է լինել նաև գյուղատնտեսության ոլորտը։
«Ընդհանրապես, կան բազմաթիվ ոլորտներ, որոնցում ԱՄԷ-ն ցանկանում է և հետաքրքրված է համագործակցել Հայաստանի Հանրապետության հետ: Մենք կարծում ենք, որ կան ոլորտներ, որտեղ երկու երկրների համագործակցությունը մոտ ապագայում կզարգանա»,-նշել է փորձագետը: