2 րոպեի ընթերցում
Աշխատանքի և սոցիալական հարցերի նախարար և «Քաղաքացիական պայմանագիր» կուսակցության վարչության անդամ Արսեն Թորոսյանը անդրադարձել է իշխող կուսակցության կողմից հայտարարված նոր նախաձեռնությանը՝ 2026 թվականի խորհրդարանական ընտրությունների համամասնական ցուցակում ընդգրկվելու համար թեկնածուների ինքնաառաջադրման հնարավորությանը։
«Արմենպրես»-ի հաղորդմամբ՝ լրագրողների հետ ճեպազրույցում Թորոսյանը նշեց, որ այս քայլը վկայում է կուսակցության թափանցիկության և ժողովրդավարական սկզբունքներին հավատարմության մասին։
«Սա վկայություն է այն բանի, որ մենք թափանցիկ կուսակցություն ենք և առաջնորդվում ենք ժողովրդավարական արժեքներով։Առիթը օգտագործելով՝ կուզեմ կոչ անել մյուս կուսակցություններին, որ հետևեն այս բացառիկ օրինակին»,-ասաց նա։
Նրա խոսքով՝ նախաձեռնությունը նաև համապատասխանում է Ընտրական օրենսգրքի պահանջներին, համաձայն որոնց՝ ցուցակի առաջին 30 թեկնածուները պետք է ընտրվեն կուսակցության համագումարի կողմից։
«Պատրաստվում ենք թեկնածուների գրանցումից հետո նրանց հարցը դնել քվեարկության՝ մեր համաժողովի ընթացքում։ Մեր պատվիրակներն են որոշելու, թե ինչպես կդասավորվեն ցուցակի առաջին համարները։ Սա ժողովրդավարության ուղիղ դրսևորում է, ինչպես նաև ներկուսակցական ժողովրդավարության ամրապնդում»,-նշեց Թորոսյանը։
Անդրադառնալով նոր կադրերի ներգրավմանը՝ նա նշեց, որ կուսակցությունը բաց է նոր մարդկանց համար, սակայն կան հստակ չափորոշիչներ։
«Եթե թեկնածուն կուսակցության անդամ չէ, պետք է ունենա վարչության առնվազն մեկ անդամի երաշխավորությունը։ Իսկ կուսակցության անդամների համար այդ սահմանափակումը չկա․ յուրաքանչյուր ՔՊ-ական կարող է առաջադրվել»,-նշեց Թորոսյանը։