Հայաստանի բարձրագույն ղեկավարությունը հարգանքի տուրք է մատուցել Հոկտեմբերի 27-ի ահաբեկչության զոհերի հիշատակին

Հայաստանի բարձրագույն ղեկավարությունը հարգանքի տուրք է մատուցել Հայաստանում 1999 թվականի հոկտեմբերի 27-ին տեղի ունեցած ահաբեկչության զոհերի հիշատակին։ 

«Արմենպրես»-ի փոխանցմամբ՝ ՀՀ նախագահ Վահագն Խաչատուրյանը, վարչապետ Նիկոլ Փաշինյանը և Ազգային ժողովի նախագահ Ալեն Սիմոնյանը ծաղիկներ են դրել Ազգային ժողովի բակում Հոկտեմբերի 27-ի ահաբեկչության զոհերի հիշատակին նվիրված հուշարձանին։ 

1999 թվականի հոկտեմբերի 27-ին Նաիրի Հունանյանը եղբոր, քեռու և մի քանի այլ անձանց հետ իրականացրել են Հայաստանի Հանրապետության Ազգային ժողովի վրա հարձակում, որը տեղի է ունեցել հերթական նստաշրջանի կառավարությանը հարց ու պատասխանի ժամանակ՝ կառավարության անդամների ներկայությամբ։ Ահաբեկչության հետևանքով զոհվել են ՀՀ ԱԺ նախագահ Կարեն Դեմիրճյանը, վարչապետ Վազգեն Սարգսյանը, խորհրդարանի փոխնախագահներ Յուրի Բախշյանը և Ռուբեն Միրոյանը, պատգամավորներ Արմենակ Արմենակյանը, Միքայել Քոթանյանը, Հենրիկ Աբրահամյանը և նախարար օպերատիվ կառավարման հարցերի գծով նախարար Լեոնարդ Պետրոսյանը, ևս 8 հոգի վիրավորվել էր։ 2003 թվականի դեկտեմբերին դատարանը Նաիրի Հունանյանին և նրա հանցախմբի 5 անդամներին դատապարտեց ցմահ ազատազրկման, հանցախմբի ևս մեկ անդամ դատապարտվեց 14 տարվա ազատազրկման: Ցմահ ազատազրկման դատապարտված Վռամ Գալստյանը հետագայում ինքնասպանություն գործեց, իսկ 14 տարվա ազատազրկման դատապարտված Համլետ Ստեփանյանը հանկարծամահ եղավ։ 2024 թվականի օգոստոսին էլ հայտնի էր դարձել, որ սրտի կաթվածից մահացել Հոկտեմբերի 27-ի գործով ցմահ դատապարտված Աշոտ Կնյազյանը։