1 րոպեի ընթերցում
Ճապոնիայի Ներկայացուցիչների պալատի անդամները Լիբերալ-դեմոկրատական կուսակցության (ԼԴԿ) նախագահ Սանաե Տակաիչիին ընտրել են վարչապետի պաշտոնում։ Նա կլինի Ճապոնիայի պատմության ընթացքում առաջին կին վարչապետը։ «Արմենպրես»-ի փոխանցմամբ՝ այս մասին հաղորդում է Kyodo գործակալությունը։
ԼԴԿ-ն, որը խորհրդարանական մեծամասնություն չունի, կոալիցիա է կազմել Ճապոնիայի նորարարական կուսակցության հետ՝ երաշխավորելով Տակաիչիի ընտրությունը։
Reuters գործակալության հաղորդմամբ՝ Տակաիչիի օգտին քվեարկել է 465 պատգամավորներից 237-ը։
Նրա թեկնածությունն, ամենայն հավանականությամբ, կհաստատվի նաև խորհրդարանի վերին պալատում, և նա կստանձնի պաշտոնը որպես Ճապոնիայի 104-րդ վարչապետ։