ՀՀ նախագահը և Բուրունդիի նորանշանակ դեսպանը մտքեր են փոխանակել տարածաշրջանային ընդհանուր իրադրության և զարգացումների շուրջ
2 րոպեի ընթերցում
Հանրապետության նախագահ Վահագն Խաչատուրյանին իր հավատարմագրերն է հանձնել Հայաստանի Հանրապետությունում Բուրունդիի Հանրապետության նորանշանակ դեսպան Էռնեստ Նդաբաշինզեն (նստավայրը՝ Հռոմ):
Ինչպես «Արմենպրես»-ին տեղեկացրին Հայաստանի Հանրապետության նախագահի աշխատակազմից, նախագահը, շնորհավորելով դեսպանին պատասխանատու պաշտոնն ստանձնելու առիթով, հույս է հայտնել, որ վերջինիս գործունեությունը կնպաստի Հայաստան-Բուրունդի հարաբերությունների սերտացմանը և նոր նախաձեռնությունների իրականացմանը։
Դեսպան Նդաբաշինզեն, շնորհակալություն հայտնելով ընդունելության համար, նշել է, որ իր համար մեծ պատիվ է Հայաստանում ներկայացնել իր երկիրը և իր ջանքերը կներդնի համագործակցության ակտիվացման համար:
Ըստ աղբյուրի՝ հանդիպման ընթացքում Հանրապետության նախագահը կարևորել է աֆրիկյան երկրների հետ հարաբերությունների ընդլայնումն ու խորացումը՝ ընդգծելով, որ Հայաստանը հետևողականորեն ակտիվացնում է քայլերը այս ուղղությամբ՝ քաղաքական խորհրդակցությունների և այլ ձևաչափերով:
Զրույցի ընթացքում անդրադարձ է կատարվել նաև զբոսաշրջության, կրթության, տեխնոլոգիական ոլորտներում համագործակցության հնարավորություններին՝ մասնավորապես, կրթական տարբեր հարթակներում և կենտրոններում փոխգործակցության ձևաչափերին։
Նշվում է, որ կողմերը մտքեր են փոխանակել տարածաշրջանային ընդհանուր իրադրության և զարգացումների շուրջ։ Քննարկվել է նաև 2026 թվականին Հայաստանում կայանալիք Կենսաբազմազանության ՄԱԿ-ի կոնվենցիայի անդամ երկրների COP-17 համաժողովի նախապատրաստական ընթացքը։ Այս համատեքստում երկուստեք շեշտվել է, որ բնակլիմայական փոփոխությունների և մարդու գործունեությունից բխող մարտահրավերներին արդյունավետորեն դիմագրավելու համար անհրաժեշտ է համաշխարհային մակարդակով համատեղ ջանքերի համախմբում։