366.85
Հայաստանի բնապահպանական օրակարգի շրջանակում Համբարձում Մաթևոսյանը հանդիպել է Վասիլիս Մարագոսի հետ
3 րոպեի ընթերցում
Հայաստանի շրջակա միջավայրի նախարար Համբարձում Մաթևոսյանն ընդունել է ՀՀ-ում Եվրոպական Միության պատվիրակության ղեկավար, դեսպան Վասիլիս Մարագոսի գլխավորած պատվիրակությանը։
Ինչպես «Արմենպրես»-ը տեղեկանում է ՀՀ ՇՄ նախարարության տարածած հաղորդագրությունից, հանդիպման ընթացքում կողմերը վերահաստատել են իրենց պատրաստակամությունը՝ շարունակելու և խորացնելու համագործակցությունը բնապահպանության ոլորտում՝ ընդլայնելով այն թե՛ քաղաքական, թե՛ գործնական հարթակներում։
Նախարարը շնորհակալություն է հայտնել Եվրոպական Միությանը՝ Հայաստանի Հանրապետությանը տարիներ շարունակ ցուցաբերած հետևողական աջակցության համար։
Ըստ նախարար Մաթևոսյանի՝ ԵՄ-ի աջակցությամբ իրականացված և շարունակվող ծրագրերը՝ կլիմայի փոփոխության, մթնոլորտային օդի պաշտպանության, ջրային ռեսուրսների կառավարման և կենսաբազմազանության պահպանման ոլորտներում, էական ներդրում են ունեցել Հայաստանի կայուն զարգացման գործում։
Կողմերը քննարկել են նաև կանաչ անցման, վերականգնվող էներգիայի և կլիմայի դիմակայունության ծրագրերի շրջանակներում համագործակցության խորացման հնարավորությունները։ Շեշտադրվել է մթնոլորտային օդի մոնիթորինգի և կառավարման համակարգերի զարգացումը, ինչպես նաև Սևանա լճի էկոլոգիական վիճակի բարելավմանն ուղղված համատեղ ծրագրերի նշանակությունը։
Հանդիպման առանցքային թեմաներից էր Կենսաբազմազանության մասին կոնվենցիայի COP17 համաժողովի կազմակերպման և նախապատրաստական գործընթացը, որը նախատեսվում է անցկացնել 2026 թվականին Հայաստանում։ Նախարարը ներկայացրել է, որ արդեն իսկ ակտիվ աշխատանքներ են տարվում համաժողովի բովանդակային օրակարգի մշակման, ենթակառուցվածքների բարելավման, ինչպես նաև տեղական և միջազգային շահակիցների ներգրավման ուղղությամբ։ Ըստ նախարարի՝ համաժողովը դիտարկվում է որպես կարևոր հարթակ՝ ներկայացնելու Հայաստանի հանձնառությունը համաշխարհային կենսաբազմազանության պահպանության գործում։
Համբարձում Մաթևոսյանը վստահություն է հայտնել, որ ԵՄ-Հայաստան երկկողմ համագործակցությունն առաջիկա տարիներին կվերածվի շոշափելի արդյունքների՝ ի նպաստ շրջակա միջավայրի պահպանության և Հայաստանի քաղաքացիների կյանքի որակի բարձրացման։
Բաժանորդագրվեք մեր ալիքին Telegram-ում