1 րոպեի ընթերցում
Հայաստանի էկոնոմիկայի նախարարի տեղակալ Արման Խոջոյանը և Զբոսաշրջության կոմիտեի նախագահ Լուսինե Գևորգյանը Կոտայքի մարզի Ձորաղբյուր համայնքի Կանաչ ուսուցման կենտրոնում մասնակցել և ողջույնի խոսքով հանդես են եկել Գյուղական կյանքի և ավանդույթների 12-րդ փառատոնին։
Ինչպես «Արմենպրես»-ը տեղեկանում է Էկոնոմիկայի նախարարության տարածած հաղորդագրությունից, ամենամյա այս փառատոնի նպատակն է նպաստել Հայաստանում կայուն գյուղատնտեսության զարգացմանը և աջակցել հայ գյուղատնտեսին ներկայացնել իրենց արտադրանքը:
Այս տարի փառատոնին մասնակցել են շուրջ 200 օրգանական և բնական գյուղմթերք արտադրողներ, ֆերմերային խմբեր, գյուղատնտեսության ոլորտի ձեռներեցներ և կանանց խմբեր Հայաստանի տարբեր մարզերից:
Փառատոնի հյուրերը հնարավորություն են ունեցել ձեռք բերել գյուղատնտեսական արտադրանքի լայն տեսականի։ Հայ գյուղատնտեսները փառատոնին ներկայացրել են տարբեր մարզերի բերքն ու բարիքը, ավանդական թխվածքներ, սեփական արտադրության չրեր, հյութեր, գինիներ, մեղվաբուծական արտադրանք, խոտաբույսեր, էկոլոգիապես մաքուր օճառներ և գյուղական այլ արտադրանք:
Փառատոնն ուղեկցվել է գյուղմթերքի տոնավաճառով, ցուցադրված են եղել նաև արհեստագործների կողմից պատրաստված ձեռագործ աշխատանքներ: