Հայաստանում 3 տարվա ընթացքում 159 անուն դասագիրք է տպագրվել

Հայաստանի կրթության, գիտության, մշակույթի և սպորտի նախարար Ժաննա Անդրեասյանը վստահեցնում է, որ այժմ Հայաստանի դպրոցներում կիրառվում են որակական մեծ փոփոխություններով դասագրքեր։ 

«Արմենպրես»-ի հաղորդմամբ՝ Ժաննա Անդրեասյանն այս մասին հայտարարել է օգոստոսի 27-ին կայացած մամուլի ասուլիսի ընթացքում։ 

Նախարարը հայտնել է, որ վերջին երեք տարվա ընթացքում տպագրվել է 159 անուն ավելի քան 220 տարբեր դասագրքեր, ընդ որում՝ ընթացիկ տարվա արդյունքներով դրանց շուրջ 45 տոկոսն ունեցել են այլընտրանք։ 

«Սա նշանակում է, որ նույն առարկայի, նույն դասարանի դասագրքից մենք ունեցել ենք երկու տարբեր դասագիրք և ուսուցիչները հնարավորություն են ունեցել ընտրելու իրենց ավելի հարմարը։ Սա նշանակում է, որ իսկապես հսկայական աշխատանք է արված, ինչը հնարավորություն է տվել մեր ուսուցիչներին ընտրել նոր ուսումնական նյութեր, դասավանդման նոր մոտեցումներ, որովհետև դասագրքերը ոչ միայն գիտելիքի և փաստերի, այլ նաև մեթոդաբանական որոշակի հնարքների և շղթայի ամբողջություն են, որոնք թույլ են տալիս ուսուցիչներին կառուցել իրենց աշխատանքը։ Մասնավորապես, այս տարի մենք նոր չափորոշչով առաջին դասարանում ենք աշխատելու․ ունենք նոր այբբենարաններ և նույնիսկ նման ուսուցման մեթոդներում կարող ենք տեսնել, որ նորություններ են առաջարկված»,-ներկայացրեց Անդրեասյանը՝ընդգծելով, որ  նշված դասագրքերը դեռևս մայիս-հունիս ամիսներին էլեկտրոնային տարբերակով հասանելի են եղել ուսուցիչներին՝ նրանց համար կազմակերպելով քննարկումներ ու հանդիպումներ հեղինակների հետ։