Լիբիայում հարձակում է տեղի ունեցել ՄԱԿ-ի առաքելության վրա. հրթիռը պայթել է Ջանզուրի համալիրի մոտ
1 րոպեի ընթերցում
Լիբիայում ՄԱԿ-ի առաքելության գլխամասային գրասենյակի մոտ, որը գտնվում է Ջանզուրի ափամերձ շրջանում՝ մայրաքաղաք Տրիպոլիի հարևանությամբ, հրթիռ է պայթել։ Այդ մասին տեղեկացնում է «Արմենպրես»-ը՝ վկայակոչելով Euronews-ը։
ՄԱԿ-ի առաքելության տվյալներով՝ միջադեպի արդյունքում զոհեր չեն եղել, և շենքը չի վնասվել։
Միջադեպը համընկել է ՄԱԿ-ի հատուկ դեսպանորդ Հաննա Թեթեհի Անվտանգության խորհրդում ունեցած ելույթի հետ, որտեղ նա զեկույց էր ներկայացնում Լիբիայում տիրող իրավիճակի վերաբերյալ։
Իր ելույթում Թեթեհը ուրվագծել է ճանապարհային քարտեզ, որը ներառում է նոր միասնական կառավարության ստեղծում, թափանցիկ ընտրություններ և երկրում արդյունավետ կառավարման վերականգնում։
Տրիպոլիում գտնվող Ներքին գործերի նախարարությունը հայտարարել է, որ միջադեպը կարող էր շատ ավելի լուրջ հետևանքներ ունենալ: Հրթիռի արձակման վայրում առգրավվել է Toyota մակնիշի մեքենա, որի մեջ հայտնաբերվել է զինամթերք:
Իրավապահ մարմինները սկսել են հետաքննություն՝ պարզելու համար ներգրավված անձանց ինքնությունը։