1 րոպեի ընթերցում
Գործարար Սամվել Կարապետյանի պաշտպանական խումբը վճռաբեկ բողոքներ է ներկայացրել՝ վիճարկելով նրա կալանավորման վերաբերյալ դատարանի որոշումը։ «Արմենպրես»-ի հաղորդմամբ՝ «Ֆեյսբուք»-ի իր էջում այս մասին տեղեկացրել է Կարապետյանի պաշտպան Արամ Վարդևանյանը։
Պաշտպանական կողմը նաև հայտնել է, որ կարգապահական վարույթ հարուցելու վերաբերյալ հաղորդումներ են ներկայացվել դատավորներ Արտակ Կարապետյանի և Արմեն Դանիելյանի դեմ։
Սամվել Կարապետյանի նկատմամբ քրեական վարույթ է հարուցվել ՀՀ Քրեական օրենսգրքի 472-րդ հոդվածի 3-րդ մասի 1-ին կետով՝ իշխանությունը զավթելու հրապարակային կոչեր հնչեցնելու հատկանիշներով։
Քննչական կոմիտեի հաղորդագրության համաձայն՝ Կարապետյանը զանգվածային լրատվամիջոցի միջոցով հարցազրույցի ընթացքում հնչեցրել է կոչեր, որոնք ուղղված են եղել «իշխանությունը զավթելուն՝ ՀՀ Սահմանադրությամբ չնախատեսված եղանակով կառավարության լիազորություններին տիրանալուն»։ Կարապետյանը կալանավորվել է հունիսի 18-ին։ Նա չի ընդունում իրեն առաջադրված մեղադրանքը։
Վերաքննիչ դատարանը՝ դատավոր Արմեն Դանիելյանի նախագահությամբ, անփոփոխ էր թողել Կարապետյանին կալանավորելու առաջին ատյանի դատարանի որոշումը։