1 րոպեի ընթերցում
Գերմանիայի կանցլեր Ֆրիդրիխ Մերցը Վաշինգտոնին խոստացել է վճռական պատասխան տալ, եթե ԱՄՆ-ի և Եվրամիության միջև առևտրային պատերազմը սրվի։ Այդ մասին տեղեկացնում է «Արմենպրես»-ը՝ վկայակոչելով Deutsche Welle-ն։
«Ամերիկյան կառավարությունը չպետք է թերագնահատի մեր պատրաստակամությունը՝ նմանատիպ միջոցառումներով արձագանքելու չափազանց բարձր մաքսատուրքերին», - ասել է Գերմանիայի կառավարության ղեկավարը։
Ըստ նրա՝ ԵՄ-ն պատրաստ է դրան, բայց շարունակում է հույս ունենալ հակամարտությունը լուծել բանակցությունների միջոցով։ Կանցլերի խոսքով՝ Գերմանիան այդ նպատակով մշտական կապի մեջ է ԱՄՆ նախագահ Դոնալդ Թրամփի և Եվրահանձնաժողովի նախագահ Ուրսուլա ֆոն դեր Լեյենի հետ։
«Մեր նպատակը եղել և մնում է արագորեն հասնել այնպիսի լուծման, որը կհեշտացնի առևտուրը Միացյալ Նահանգների հետ և թույլ կտա կրկին իջեցնել մաքսատուրքերը։ Մենք այժմ մինչև հուլիսի վերջ ժամանակ ունենք բանակցելու համար»,- ասել է Մերցը։
Նրա խոսքով՝ վերջին օրերին ինքը աշխատել է, որպեսզի Եվրամիությունը չսահմանի պատասխան բարձր մաքսատուրքեր հուլիսի 12-ին Թրամփի ծանուցումից անմիջապես հետո, հակառակ դեպքում դա կարող էր ինքնըստինքյան տեղի ունենալ երեկ։