Չինաստանի Տյանցզին քաղաքում Հայհե գետով երեկոյան նավարկությունը վառ ու անմոռաց տպավորությունների հրավիրատոմս է

Չինաստանում քաղաքային գեղատեսիլ վայրեր փնտրող զբոսաշրջիկները յուրահատուկ հնարավորություն ունեն Տյանցզին քաղաքում երեկոյան նավարկություն կատարելու Հայհե գետի երկայնքով՝ միաժամանակ ականատես լինելով պատմաճարտարապետական ժառանգությանն ու նեոնային լույսերով աչք շոյող ափամերձ զբոսավայրերին: 

«Արմենպրես»-ի թղթակիցը չինական CGTN մեդիակորպորացիայի կողմից կազմակերպված «China Up Close» միջազգային լրագրողական ծրագրի շրջանակներում շրջայց է կատարել Տյանցզինում՝ ծանոթանալով նաև քաղաքի հյուրընկալ վայրերին:  

Հայհե գետը Չինաստանի յոթ խոշոր գետերից մեկն է, իսկ նրա ջրային համակարգն ամենախոշորն է երկրի  հյուսիսային հատվածում։ Տյանցզինում գետի երկարությունը կազմում է 73 կմ։

Այս բնակավայրի ժամանակակից քաղաքակրթությունն ակունքվում է Հայհե  գետից, որը կապում է նրա անցյալը, ներկան և ապագան։  

Գետի գեղատեսիլ երթուղին Տյանցզինի գլխավոր զբոսաշրջային գոտին է, որը ձգվում է ափերի երկայնքով: Նավարկության ընթացքում ուղեկցում են քաղաքի պատմական ճարտարապետության և ժամանակակից տեսքով ներդաշնակորեն միահյուսված գեղեցիկ տեսարանները:

Ափամերձ գոտու երկայնքով տեղակայված են արևմտյան ոճի փոքր շենքերին բնորոշ ճարտարապետական ​​համալիրներ, պատմության հետքը կրող հայտնի մարդկանց տուն-թանգարաններ, ինչպես նաև նեոնային լույսերով փայլող երկնաքերներ:  

Գետի երկայնքով նավակով զբոսանքի երթուղին ներառում է «Տյանցզինի աչք»-ը, որն աշխարհում եզակի «սատանայի անիվ»-ն է՝ ներկառուցված կամրջի մեջ: 

Բացի այդ՝ կան բազմաթիվ խորհրդանշական կամուրջներ, որոնցից յուրաքանչյուրն ունի բնապատկերային իր առանձնահատուկ տեսարանը, ճարտարապետական ​​հմայքը։ 

Տյանցզինում այս տարի մեկնարկել են նաև «Հայհե գետի գիշեր» խորագրով միջոցառումներ, որոնք գետի ափամերձ հատվածում  ներկայացումների, ոչ նյութական մշակութային ժառանգության ցուցադրությունների շարք են ՝ թույլ տալով այցելուներին զգալ քաղաքի գեղարվեստական ​​մթնոլորտը:  

Միևնույն ժամանակ, հիմնվելով Հայհե գետի ափամերձ շենքերի, կամուրջների և ափամերձ տարածքների լանդշաֆտի վրա՝ այստեղ լուսավորության բարելավման մանրակրկիտ աշխատանքներ են իրականացվել 216 շենքերի, 13 կամուրջների, 8.2 կմ գետափի և 7 նավամատույցների վրա՝ ստեղծելով վառ և արտահայտիչ գիշերային տեսարան: