384.14
3 րոպեի ընթերցում
Մոսկվայի Տիմիրյազև ցուցահանդեսային կենտրոնում մեկնարկել է TOON EXPO MOSCOW 2025-ը՝ հնարավորություն տալով մոսկվայաբնակ հայերին և տեղացիներին ծանոթանալ ներկայացված ավելի քան 50 նախագծերին, որոնցով հանդես են գալիս Հայաստանի առաջատար կառուցապատողները, արտերկրում անշարժ գույք ներկայացնող ընկերությունները, բանկերը և անշարժ գույքի գործակալությունները։ Ցուցահանդեսի կարգախոսն է՝ ՀՀ անշարժ գույքն՝ ավելի հասանելի սփյուռքին:
«Արմենպրես»-ի հետ զրույցում Big Projects ընկերության համահիմնադիր, հանրային կապերի պատասխանատու Դիանա Հարոյանն ընդգծեց՝ իրենց թիմի համար շատ մեծ հպարտություն է, որ հոբելյանական հինգերորդ TOON EXPO-ն անցկացվում է Մոսկվայում:
«Բավականին դժվարությամբ, բայց մեզ հաջողվեց հավաքել մեր գործընկերներին Մոսկվայում և ներկայացնել Հայաստանի անշարժ գույքի շուկան մոսկվայաբնակ մեր հայրենակիցներին: Մենք շատ հստակ տեսնում էինք, որ հայկական անշարժ գույքի նկատմամբ մեծ պահանջարկ կար սփյուռքում, և մենք այստեղ ներկայացնում ենք ոչ միայն բնակելի անշարժ գույքեր, այլ նաև՝ ներդրումային մի շարք նախագծեր, որովհետև այս պահին Հայաստանում կառուցվում են շատ հյուրանոցային համալիրներ, ապարտ հոթելներ և ներդրումների համար բավականին լավ նախագծեր, որոնք էլ այս օրերին ներկայացվելու են մեր սփյուռքի հայությանը »,- ասաց Դիանա Հարոյանը:
Ցուցահանդեսին բոլոր տաղավարները հանդես կգան միայն այս 3 օրերի համար նախատեսված հատուկ առաջարկներով և զեղչերով։
Բնակարան ձեռք բերելու հարցում ֆինանսապես կօգնի Ամերիաբանկը՝ տրամադրելով շահավետ հիպոթեկային վարկեր՝ հատուկ մշակված սփյուռքի համար:
Sunday Towers ընկերությունը Մոսկվայում է՝ առաջարկելու նոր կառուցվող բնակելի համալիր՝ տարբերվող ու հետաքրքիր լուծումներով:
Top Buildings ընկերություն էլ, ներկայացնելով 16 հարկից բաղկացած նորակառույց բնակելի համալրը, նպատակ ունի խթանելու հայրենադարձությունը:
New Komitas բնակելի համալիրի՝ գերժամանակակից լուծումներով հագեցած արևկող և հարմարավետ բնակարաններ էլ կգոհացնեն բոլոր քմահաճ այցելուներին:
Ցուցահանդեսին ներկայացված ընկերությունները նշեցին՝ իրենց հիմնական նպատակներից է սփյուռքի հայրենակիցներին տալ hնարավորություն և նրանց ավելի մոտեցնել, կապել հայրենիքին:
Ցուցահանդեսն այցելուների համար բաց կլինի մինչև հունիսի 29-ը: Մուտքն ազատ է: