Քննչական կոմիտեն մանրամասներ է ներկայացրել Սամվել Կարապետյանին առնչվող քրեական վարույթի վերաբերյալ

Հայաստանի քննչական կոմիտեն մանրամասներ  է ներկայացրել գործարար, «Տաշիր» ընկերությունների խմբի հիմնադիր Սամվել Կարապետյանին առնչվող քրեական վարույթի վերաբերյալ։ 

ՀՀ քննչական կոմիտեից «Արմենպրես»-ին տված մեկնաբանության մեջ ասված է. 

«ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչություն ստացված հաղորդման հիման վրա ՀՀ քրեական օրենսգրքի 422-րդ հոդվածի 2-րդ մասով նախաձեռնվել է քրեական վարույթ այն կապակցությամբ, որ Ս.Կ.-ն զանգվածային լրատվության միջոցով հարցազրույց տալու ընթացքում հնչեցրել է իշխանությունը զավթելուն՝ ՀՀ սահմանադրությամբ չնախատեսված եղանակով ՀՀ կառավարության լիազորություններին տիրանալուն ուղղված հրապարակային կոչ: 2025 թվականի հունիսի 18-ին միջնորդություն է ներկայացվել քրեական վարույթի օրինականության նկատմամբ հսկողություն իրականացնող դատախազին՝ հանրային քրեական հետապնդում հարուցելու մասին, որի կապակցությամբ վերջինիս կողմից նույն օրը որոշում է կայացվել Ս.Կ.-ի նկատմամբ ՀՀ քրեական օրենսգրքի 422-րդ հոդվածի 2-րդ մասով հանրային քրեական հետապնդում հարուցելու մասին։ 2025 թվականի հունիսի 18-ին Ս.Կ.-ն ձերբակալվել և ներկայացվել է վարույթն իրականացնող մարմին։ Միջնորդություն է ներկայացվել դատարան՝ վերջինիս նկատմամբ կալանքը որպես խափանման միջոց կիրառելու վերաբերյալ»:

Ավելի վաղ Սամվել Կարապետյանի փաստաբանները հայտնել էին, որ Կարապետյանը չի ընդունում իրեն առաջադրված մեղադրանքը։ 

Սամվել Կարապետյանը, անդրադառնալով Հայ Առաքելական եկեղեցու որոշ հոգևորականների և իշխանության ներկայացուցիչների միջև վերջին շրջանում առկա բանավեճին, հայտարարել էր, որ ինքը եկեղեցու կողքին է. «Եթե քաղաքական չհաջողվի, մենք մեր ձևով կմիջամտենք եկեղեցու դեմ արշավին»,- ասել էր Կարապետյանը։