1 րոպեի ընթերցում
Հայաստանի Հանրապետության նախագահ Վահագն Խաչատուրյանը Մայիսի 9-ի՝ Հաղթանակի և խաղաղության տոնի կապակցությամբ ուղերձ է հղել՝ ընդգծելով պատմական հաղթանակի և խաղաղության պահպանման կարևորությունը։ «Արմենպրես»-ի հաղորդմամբ՝ ուղերձում նախագահը խոնարհում է հայտնել նրանց հիշատակի առաջ, ովքեր իրենց կյանքը զոհաբերեցին ֆաշիզմի դեմ մղված պայքարում՝ ազատության և արժանապատիվ ապագայի համար։
«Հայ ժողովուրդն իր անգնահատելի ներդրումն է ունեցել այդ պատմական հաղթանակում։ Հարյուր հազարավոր հայորդիներ մարտնչել են ամենատարբեր ռազմաճակատներում՝ Խորհրդային Միության և դաշնակիցների բանակների կազմում, աննահանջ պայքար մղել, ցուցաբերել անձնազոհություն ու հերոսություն»,- նշել է նախագահը։
Նախագահը շեշտել է, որ այսօր, երբ աշխարհը կրկին բախվում է խաղաղության սպառնալիքներին, Մեծ Հաղթանակի դասերը ավելի քան երբևէ արդիական են։ Խաչատուրյանի խոսքով՝ խաղաղությունը արժեք է, որը պետք է անընդհատ պահպանել, պաշտպանել և ամրապնդել։
«Թող մեր վետերանների սխրանքն ու հիշատակը լինեն հավերժ կենդանի, դառնան մեր ուղեցույցն ու ոգեշնչման աղբյուրը։
Թող երբեք չմռայլվի խաղաղ երկինքը մեր ժողովրդի գլխավերևում։
Շնորհավոր Հաղթանակի և խաղաղության տոն»,- եզրափակել է նախագահը։