«Պատիվ ունեմ»-ը չունի վարչապետի թեկնածու. խմբակցությունը պատասխանել է «Արթուն ենք» շարժման նամակին

Հայաստանի Ազգային ժողովի «Պատիվ ունեմ» խմբակցությունն արձագանքել է «Արթուն ենք» քաղաքացիական շարժման անդամ Էդգար Ղազարյանի նամակին վարչապետ Նիկոլ Փաշինյանին անվստահություն հայտնելու գործընթաց սկսելու վերաբերյալ։

Ինչպես հայտնում է «Արմենպրես»-ը, խմբակցության ղեկավար Հայկ Մամիջանյանը տեղեկությունը հրապարակել է «Ֆեյսբուք»-ի իր էջում։

Խմբակցության պատասխանում «գործընթացն ավելորդ քաղաքական նկրտումներով չբարդացնելու համար» հայտարարում են, որ այս պահին չունեն վարչապետի թեկնածու։ «Մեր պատրաստակամությունն ենք հայտնում՝ առանց որևէ նախապայմանի քննարկել թեկնածուի հարցը և նախաձեռնել վարչապետին անվստահություն հայտնելու գործընթաց»,-նշել են խմբակցությունից։

Ապրիլի 28-ին «Արթուն ենք» քաղաքացիական շարժման անդամներ Էդգար Ղազարյանն ու Նարեկ Մալյանը 107 պատգամավորի անունով նամակներ էին փոխանցել Ազգային ժողով՝ կոչ անելով նախաձեռնել վարչապետ Նիկոլ Փաշինյանին անվստահություն հայտնելու գործընթաց։

Ավելի վաղ «Արթուն ենք» շարժման անդամների նախաձեռնությանն անդրադարձել էր ԱԺ ընդդիմադիր մյուս խմբակցությունը՝ շեշտելով, որ քաղաքացիական շարժման անդամների գործելաոճը կասկածներ է առաջացնում «Հայաստան» խմբակցության անդամների մոտ, թե արդյոք նախաձեռնությունն ուղղված է Նիկոլ Փաշինյանին հեռացնելուն, թե՞ դրա տակ թաքնված է «Հայաստան» խմբակցությանը թիրախավորելու նպատակ։ Խմբակցությունը նկատել էր, որ գործող վարչապետին անվստահություն հայտնելն Ազգային ժողովում կարող է քննարկվել միայն այն դեպքում, երբ առնվազն 36 պատգամավոր տրամադրի գործընթացի մեկնարկի համար անհրաժեշտ ստորագրություն։ Գործընթացի հաջողության համար պահանջվում է նվազագույնը 54 ձայն՝ ԱԺ պատգամավորների պարզ մեծամասնությունը: