Չինաստանի Դոնգսյաոկու քաղաքի և հարևան գյուղերի համար սպորտային ինդուստրիան զարգացման խթան է դարձել

Չինաստանի մայրաքաղաք Պեկինի հարևանությամբ գտնվող Դոնգսյաոկու քաղաքը որպես բարգավաճման շարժիչ ուժ օգտագործում է սպորտային ինդուստրիայի զարգացումը՝ ձգտելով այն դարձնել այցեքարտ ու բարձրորակ ապրանքանիշ:

«Արմենպրես»-ի թղթակիցը Չինաստանի մամուլի հետ կապերի միջազգային կենտրոնի (CIPCC) ծրագրի շրջանակներում այցելել է քաղաքի խոշորագույն՝ «Շանդուն» մարզական կենտրոն և ծանոթացել տեղի մարզամշակութային առանձնահատկություններին, մասնավորապես թենիսի կորտերի ենթակառուցվածքային նորարարություններին:

Քաղաքում «Շանդուն» մարզական կենտրոնի ստեղծումը հանգեցրել է սպորտային ինդուստրիայի ընդլայնմանը, ինչպես նաև քաղաքի շրջակայքում մարզական ոլորտի նորարարությունների և զարգացումների հավաքագրմանը, ինչն էլ հնարավորություն է տվել արդյունավետ իրականացնել միաժամանակ և ֆիթնեսի հանրահռչակումը, և գյուղական բնակավայրերի վերածնունդը: 

Դոնգսյաոկուն վերջին տարիներին զգալի փոփոխությունների է ենթարկվել «Շրջակա միջավայրի վերականգնում+քաղաքների արդիականացում» ծրագրի շնորհիվ: 

Դրա առաջին նպատակն ուղղված է շրջակա միջավայրի նորացմանը. Դոնգսյաոկուն, ունենալով լայնատարած անտառներ ու զբոսայգիներ, կարևոր հանգույց է մայրաքաղաք Պեկինի «Կանաչ մեկուսացման գոտում» և օդափոխման Հյուսիսային միջանցքում: 

Երկրորդը վերաբերում է սպորտային ինդուստրիայի արդիականացմանը. Դոնգսյաոկուն, որը գտնվում է խոշոր՝ Հաիդիան և Չաոյանգ թաղամասերի հարևանությամբ, ընդգրկում է սպորտային ինդուստրիայով զբաղվող մեծաթիվ մարդկանց:

«Shandong Sports Center»-ը, որը կառուցվել է 10 հազար հեկտար կանաչ տարածքի վրա, քաղաքի բարձրակարգ պրոֆեսիոնալ մարզական հաստատությունները, ինչպես նաև համատեղ ջանքերով ստեղծված տարբեր մարզական միջոցառումները հզոր խթան են հաղորդել տեղում սպորտային ինդուստրիայի զարգացմանը: 

Երրորդ ասպեկտը մշակույթի զարգացումն է. քաղաքը, խորապես ուսումնասիրելով տեղական մշակութային առանձնահատկությունները և պատմական ժառանգությունը, մի կողմից պաշտպանում և կրում է ավանդականը, մյուս կողմից կենտրոնանում է տարբեր մարզամշակութային միջոցառումներ անցկացնելու վրա՝ այդ համադրությամբ ստեղծելով եզակի ապրանքանիշ:

Ապագայում Դոնգսյաոկու քաղաքը կօգտագործի իր հսկայական կանաչ ռեսուրսները անտառների օգտագործման վրա հիմնված տնտեսությունը զարգացնելու համար և կշարունակի պլանավորել և կառուցել նոր սպորտային զբոսայգիներ և մշակութային և սպորտային վայրեր: Այն նաև կվերականգնի չօգտագործված տարածքները փակ մարզական մրցահրապարակների կառուցման համար։ 

Դոնգսյաոկուն ներկայում գտնվում է համայնքապատկան սպորտային և մշակութային ընկերություն ստեղծելու գործընթացում՝ սպորտային արդյունաբերության ցանցային ձեռնարկությունների ներգրավմամբ սպորտային արդյունաբերության էկոհամակարգ ստեղծելու համար: 

Մշտապես անցկացնելով բարձր մակարդակի մարզական միջոցառումներ՝ քաղաքը ձգտում է ստեղծել հայտնի ապրանքանիշ՝ «Շանդոնգ» սպորտային միջոցառումներ: 

Ակնկալվում է, որ այս ջանքերը կհանգեցնեն էկոլոգիական միջավայրի և սպորտային արդյունաբերության «կրկնակի նորացման», ինչպես նաև կկառուցվի ժամանակակից քաղաք, որը կլինի էկոլոգիապես կենսունակ, բարեկեցիկ և մշակութային աշխուժությամբ:

Ընթացիկ տարվա ապրիլին Դոնգսյաոկուի «Շանդուն» մարզական կենտրոնը հյուրընկալել էր ITF-ի World Tennis Masters Tour MT200 «Շանդունի գավաթ-2025» մրցաշարը: Այստեղ, բացի 16 միջազգային չափանիշներով թենիսի կորտերի առկայությունից, «խելացի» սարքավորումները և էկոլոգիապես մաքուր դիզայնը ինչպես խաղացողների, այնպես էլ հանդիսատեսի սպասարկման բարձր որակ են ապահովում՝ միաժամանակ հավակնելով վերածվել սպորտային տեսարժան վայրի: 

Ինչ վերաբերում է մրցաշարին, ապա այն այս տարի համախմբել էր ավելի քան 500 թենիսի սիրահարի ամբողջ աշխարհից՝ սահմանելով նոր ռեկորդ Պեկինում անցկացվող սիրողական մրցումների մասշտաբների առումով, ինչպես նաև՝ ցույց տալով դրա միջազգային ընդգրկումը: 

Միջոցառման ընթացքում կազմակերպվում են նաև թենիսի թեմատիկայով սննդի ու ձեռքի աշխատանքների տոնավաճառ, ինչը միտված է մշակութային տարբեր ճյուղերի հետ սպորտային մրցումների խորը ինտեգրմանը: