Թբիլիսիում մեկնարկել է Հայաստանի, Վրաստանի և Ադրբեջանի ԱԳ փոխնախարարների հանդիպումը
1 րոպեի ընթերցում
Վրաստանի մայրաքաղաք Թբիլիսիում մեկնարկել է Հայաստանի, Վրաստանի և Ադրբեջանի արտաքին գործերի փոխնախարարների եռակողմ հանդիպում՝ նվիրված տարածաշրջանային համագործակցության հեռանկարներին:
«Արմենպրես»-ի հաղորդմամբ՝ այս մասին հայտնում է Sputnik գործակալության վրացական ծառայությունը՝ վկայակոչելով Վրաստանի արտաքին գործերի նախարարի տեղակալ Լաշա Դարսալիայի խոսքերը։
Վերջինս հայտնել է, որ երեք երկրների միջև հանդիպմանը բացման խոսքով է հանդես եկել Վրաստանի ԱԳ նախարար Մակա Բոչորիշվիլին։
«Հանդիպման ընթացքում կքննարկվեն եռակողմ համագործակցության հնարավորությունները, կբացահայտվեն հնարավոր համագործակցության ոլորտները, որպեսզի տարածաշրջանի երկրները համատեղ մոտեցումներ մշակեն մի շարք հարցերի շուրջ»,- լրագրողներին ասել է Լաշա Դարսալիան:
Ավելի վաղ, Թբիլիսիում կայանալիք հանդիպման մասին հայտնել էր ՀՀ ԱԳ նախարարության մամուլի խոսնակ Անի Բադալյանը՝ մանրամասնելով, որ հանդիպմանը հայկական կողմը ներկայացնում է ԱԳ նախարարի տեղակալ Վահան Կոստանյանը։
Հանդիպմանը վրացական կողմը ներկայացնում է Վրաստանի ԱԳ նախարարի տեղակալ Լաշա Դարսալիան, իսկ ադրբեջանական կողմից հանդիպմանը մասնակցում է Ադրբեջանի ԱԳ նախարարի տեղակալ Էլնուր Մամեդովը։