Գյումրիում չորս ուժերի առաջին համարներն իրենց տեսակետները հայտնեցին ընտրությունների ու քաղաքի զարգացման վերաբերյալ

Գյումրիում ավագանու ընտրությունների քվեարկությանը քաղաքական ուժերից առաջինը իր քաղաքացիական պարտքը կատարեց «Մեր քաղաքը» դաշինքի քաղաքապետի թեկնածու Մարտուն Գրիգորյանը: Ինչպես տեղեկացնում է «Արմենպրես»-ը, նա ընտրեց թիվ 31/51 ընտրատեղամասում: Ընտրատեղամաս էր եկել կնոջ հետ: 

Պատասխանելով լրագրողների հարցին՝ Մարտուն Գրիգորյանը նշեց, որ թեև կոալիցիա կազմելուն դեմ է, բայց համագործակցությանը կողմ է: «Ընդդիմադիր թեկնածուները համաձայնության կգան, որ Գյումրիում «Քաղաքացիական պայմանագիր»-ն իշխանություն չլինի»,- քվեարկելուց հետո լրագրողների հետ զրույցում ասաց «Մեր քաղաքը» դաշինքի ցուցակը գլխավորող Մարտուն Գրիգորյանը: 

Թեկնածուն հույս հայտնեց, որ ամեն ինչ նորմալ է ավարտվելու: «Մինչ այս բոլորը կանխատեսում էին, որ Գյումրիում պետք է լարվածություն լինի, թշնամանք լինի, բայց ընդդիմադիր թեկնածուների կողմից լարվածություն չկա»,- նշեց Մարտուն Գրիգորյանը՝ հավելելով, որ 50+ տոկոս ձայներ չհավաքելու դեպքում պետք է համաձայնության գան իշխանություն ձևավորելու համար: 

Ավելի ուշ իր ընտրական պարտքը Գյումրու թիվ 31/18 ընտրատեղամասում կատարեց «Իմ հզոր համայնք» կուսակցության ցուցակը գլխավորող թեկնածու Ռուբեն Մխիթարյանը։ Լրագրողների հետ ճեպազրույցի ընթացքում թեկնածուն կարծիք հայտնեց, որ ՔՊ-ն քաղաքապետ չի ունենա։ 

Կոմունիստական կուսակցության ցուցակի առաջատար Վարդան Ղուկասյանը լրագրողներին հայտարարեց, որ եթե իրենք շատ ձայն չհավաքեն, միանալու են այն ընդդիմադիր ուժին, որը կհավաքի առավելագույն ձայներ: Վարդան Ղուկասյանն ընտրության մասնակցում էր Գյումրու թիվ 6 դպրոցում տեղակայված թիվ 31/45 ընտրատեղամասում: Նա ընտրության էր եկել թոռների հետ: Ընտրական տեղամասում նկատվում էր մեծ ակտիվություն: 

Վարդան Ղուկասյանի խոսքով` Գյումրու ընտրությունները ճակատագրական են լինելու: Նա հորդորեց բոլոր գյումրեցիներին չլինել անտարբեր և գնալ ընտրության: 

«Քաղաքացիական պայմանագիր» կուսակցության ցուցակը գլխավորող Սարիկ Մինասյանը, որը թիվ 31/53 ընտրատեղամաս էր եկել որդու հետ, լրագրողների հետ զրույցում նշեց. «Գյումրեցին իր քվեն հստակ տալու է մեր երեխաների և զարգացող քաղաքի համար՝ կատարելով իր ընտրական պարտքը։ Մեր գյումրեցիներն իրենց քվեն կտան առաջիկա հինգ տարիներին զարգացող Գյումրի տեսնելու և երեխաների ապագայի համար: Գյումրեցիները գիտակից են՝ իրենց ընտրությունն այսօր կկատարեն, ու վաղը բոլորը կտեսնեն արդյունքները: Ես իմ որդուն եմ խոսք տվել՝ ունենալու ենք զարգացող Գյումրի, համերաշխ հասարակություն, ինչը կապացուցվի քվեարկությամբ»։ Սարիկ Մինասյանը վստահ է` իշխող ուժը կհավաքի առավելագույն ձայներ ու կհաղթի: