1 րոպեի ընթերցում
ԱՄՆ-ի Օդագնացության և տիեզերական հետազոտությունների ազգային գործալակությունը (ՆԱՍԱ) մեկ շաբաթվա ընթացքում կրճատել է իր ծախսերը 420 միլիոն դոլարով։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել է պետական կառավարման արդյունավետության վարչությունը, որի ղեկավարն է ամերիկացի ձեռնարկատեր Իլոն Մասկը։
«Լավ աշխատանք ՆԱՍԱ-ում այս շաբաթ։ Մենք վերացրել ենք նրանց չօգտագործված գնումների քարտերը (մոտ 80%) և խզել մոտ 420 միլիոն դոլարի ավելորդ պայմանագրերը, այդ թվում՝ 45 միլիոն դոլար արժողությամբ կորպորատիվ կառավարման փոփոխության աջակցության պայմանագրերը երեք տարբեր խորհրդատուների հետ», - հայտնել է վերոհիշյալ վարչությունը:
ԱՄՆ-ի նախագահ Դոնալդ Թրամփի կողմից ստեղծված պետական կառավարման արդյունավետության վարչությունը կոչված է չեղարկել վատնվող ծախսերը և վերակառուցել դաշնային գործակալությունները:
ԱՄՆ-ի Ներկայացուցիչների պալատի խոսնակ Մայք Ջոնսոնն ավելի վաղ ասել էր, որ հիշյալ վարչությունը հայտնաբերել է նաև ԱՄՆ-ի կառավարության «ցնցող» ծախսերը, որոնց համար Կոնգրեսից թույլտվություն չեն ստացել:
