2 րոպեի ընթերցում
ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը հայտարարել է, որ Եվրամիությունը կշարունակի չեղարկել Սիրիայի նկատմամբ պատժամիջոցները, չնայած երկրում սկսված բռնություններին, որոնց հետևանքով հարյուրավոր քաղաքացիներ են սպանվել կառավարամետ զինյալների կողմից: «Արմենպրես»-ի փոխանցմամբ՝ այս մասին հաղորդում է «ՌԻԱ Նովոստի» գործակալությունը:
«Սա շատ դժվար քննարկում է: Մենք կցանկանայինք տեսնել և տեսնում ենք, որ Սիրիայի իշխանությունները պատասխանատվության են ենթարկում այն անձանց, որոնք իրականացրել են այդ բռնությունները… Մենք կշարունակենք պատժամիջոցների չեղարկումը», - Կալասը Բրյուսելում ասել է լրագրողներին:
Նրա խոսքով՝ պատժամիջոցների վերացումը նպաստում է բնակչությանը հիմնական ծառայությունների ցուցաբերմանը, այդ թվում՝ ապահովում է հասանելիությունը բանկային հատվածին։
«Մենք այդ ամենը կքննարկենք, բայց հենց հիմա մենք առաջ ենք շարժվում պատժամիջոցների չեղարկման ճանապարհով», - ասել է ԵՄ դիվանագիտության ղեկավարը։
Եվրամիությունը, որը երկար տարիներ բոյկոտ է հայտարարել Բաշար ալ Ասադի կառավարությանը, ակտիվ երկխոսություն է վարում Սիրիայի նոր իշխանությունների հետ։ Փետրվարի վերջին Եվրամիությունն սկսեց չեղարկել Սիրիայի դեմ պատժամիջոցները՝ վերացնելով մի շարք սահմանափակումներ էներգետիկայի, տրանսպորտի և բանկային ոլորտներում։ Չեղարկվել է նաև ԵՄ երկրներից Սիրիա անձնական օգտագործման համար լյուքս դասի իրերի ներմուծման արգելքը։ ԵՄ-ում խոստացել են շարունակել այլ պատժամիջոցների գնահատումը, որոնք նույնպես կարող են չեղարկվել ապագայում։