Վրաստանը պատմական քայլ է համարում Հայաստանի և Ադրբեջանի միջև խաղաղության պայմանագրի շուրջ բանակցությունների ավարտը
1 րոպեի ընթերցում
Վրաստանը ողջունել է Հայաստանի և Ադրբեջանի միջև խաղաղության պայմանագրի 17 հոդվածների շուրջ համաձայնության մասին երկու երկրներից հնչած հայտարարությունները։
«Արմենպրես»-ի փոխանցմամբ՝ այս մասին գրառում է հրապարակվել Վրաստանի արտաքին գործերի նախարարության X-ի միկրոբլոգում։
«Վրաստանը ողջունում է Հայաստանի և Ադրբեջանի միջև բանակցությունների ավարտը խաղաղության պայմանագրի 17 հոդվածների շուրջ։ Սա պատմական քայլ է տարածաշրջանում երկարատև խաղաղության և կայունության տեսանկյունից»,- նշված է գրառման մեջ։
Հայաստանի և Ադրբեջանի միջև խաղաղության պայմանագրի շուրջ բանակցությունների ավարտին անդրադարձել է նաև Վրաստանի արտաքին գործերի նախարարի առաջին տեղակալ Լաշա Դարսալիան՝ շեշտելով, որ դա իսկապես պատմական քայլ է, որը նպաստելու է Հարավային Կովկասի տարածաշրջանում անվտանգությանը, կայունությանը և համագործակցությանը։
Հայաստանն ու Ադրբեջանը մարտի 13-ին հայտարարել են, որ վերջնական համաձայնության են հասել խաղաղության պայմանագրի նախագծի տեքստի շուրջ։ Հայաստանի արտաքին գործերի նախարարությունը հայտարարել է, որ պատրաստ է Բաքվի հետ քննարկումներ սկսել պայմանագրի ստորագրման ժամկետների և վայրի վերաբերյալ։