Շենգավիթի համայնքային ոստիկանները վնասազերծել են նռնակներով սպառնացող երիտասարդին

Ոստիկանության օպերատիվ կառավարման կենտրոն մարտի 13-ի լուսադեմին զանգել է մի քաղաքացի և խնդրել, որ Նոր Խարբերդի 16-րդ փողոցի տներից մեկին ոստիկան մոտենա։

Ինչպես «Արմենպրես»-ը տեղեկանում է Ոստիկանության տարածած հաղորդագրությունից, նշված հասցե են մեկնել ոստիկաններ, սակայն ահազանգած 28-ամյա քաղաքացին երկու նռնակ ձեռքին պահանջում էր չմոտենալ, սպառնում էր գրավել և պայթեցնել տունը։

Համայնքային ոստիկանների բացատրական աշխատանքի շնորհիվ երիտասարդը իրավապահներին է հանձնել նռնակները։

Նա ձերբակալվել և տեղափոխվել է Ոստիկանության Շենգավիթի բաժին։

Կազմված փաստաթղթերը ներկայացվել են նախաքննական մարմին։