2 րոպեի ընթերցում
Տաջիկստանի և Ղրղզստանի նախագահներ Էմոմալի Ռահմոնը և Սադիր Ժապարովը տեսակապի միջոցով բացել են ընդհանուր պետական սահմանի հսկիչ անցակետերը։ «Արմենպրես»-ի փոխանցմամբ՝ այդ մասին իրադարձությունների վայրից հաղորդել է ՏԱՍՍ-ի թղթակիցը։
«Ղրղզստանի Հանրապետության նախագահ Սադիր Ժապարովը և Տաջիկստանի Հանրապետության նախագահ Էմոմալի Ռահմոնն այսօր՝ մարտի 13-ին, տեսակապի ռեժիմով հետևել են երկրների միջև սահմանի բացմանը», - նշված է հաղորդագրության մեջ։
Տաջիկստանի ղեկավարն առաջին պետական այցով գտնվում է Ղրղզստանում։ Նախագահների բանակցությունների արդյունքներով ստորագրվել են երկու երկրների միջև պետական սահմանի մասին համաձայնագիր և երկկողմ այլ փաստաթղթեր։
Բիշքեկում կայացած բանակցություններում Ղրղզստանի ղեկավար Սադիր Ժապարովը հայտարարել է, որ Ղրղզստանի և Տաջիկստանի սահմանի մասին համաձայնագրի ստորագրումը կամրապնդի ոչ միայն երկու հանրապետությունների, այլև ամբողջ տարածաշրջանի անվտանգությունը։
«Պայմանագրի ստորագրումն ավանդ կներդնի ոչ միայն մեր երկրների, այլև ամբողջ տարածաշրջանի անվտանգության ամրապնդման գործում», - ասել է նա։
Ղրղզստանի և Տաջիկստանի միջև սահմանի երկարությունը մոտ 980 կմ է։ Դրա սահմանագծման շուրջ բանակցությունները շարունակվում են 2002 թ. դեկտեմբերից։ Այդ հարցի չկարգավորվածությունը բազմիցս դարձել է բախումների պատճառ երկու հանրապետությունների բնակիչների և զինծառայողների մասնակցությամբ, այդ թվում՝ հրազենի կիրառմամբ։ Դրանցից վերջինը տեղի է ունեցել 2022 թ. աշնան սկզբին։ Ընդհանուր առմամբ, 2014 թվականից ի վեր ղրղզատաջիկական սահմանին տեղի է ունեցել ավելի քան 10 լուրջ ընդհարում։
Փետրվարի 21-ին երկու երկրների պաշտոնյաները Բիշքեկում ստորագրել են սահմանի ընդհանուր հատվածի սահմանագծման շուրջ արձանագրությունը: