Տիգրան Խաչատրյանն ու Էրիկ Լոմբարդը քննարկել են Հայաստան-Ֆրանսիա տնտեսական համագործակցության զարգացման հեռանկարները
2 րոպեի ընթերցում
Հայաստանի Հանրապետության փոխվարչապետ Տիգրան Խաչատրյանի գլխավորած պատվիրակությունը Ֆրանսիայի Հանրապետություն կատարած աշխատանքային այցի շրջանակներում հանդիպել է Ֆրանսիայի էկոնոմիկայի, ֆինանսների, արդյունաբերական և թվային ինքնավարության նախարար Էրիկ Լոմբարդին:
Ինչպես «Արմենպրես»-ը տեղեկանում է ՀՀ կառավարության տարածած հաղորդագրությունից, հանդիպման ընթացքում քննարկվել են Հայաստան-Ֆրանսիա տնտեսական համագործակցության զարգացման հեռանկարները, մասնավորապես՝ երկկողմ տնտեսական օրակարգում փոխադարձ առևտրի և ներդրումների նոր ուղղությունների ներառման, ինչպես նաև երկու երկրների մասնավոր հատվածների միջև գործարար կապերի ընդլայնման միջոցով։
Տիգրան Խաչատրյանն, ընդգծելով ֆրանսիական ձեռնարկությունների հետ ձևավորված համագործակցության հաջող փորձը, կարևորել է Հայաստանում ֆրանսիական ընկերությունների ավելի մեծ ներկայություն ապահովելու անհրաժեշտությունը, այդ թվում՝ նոր գիտելիքի ներգրավման և գործարար մշակույթի զարգացման տեսանկյունից:
Անդրադարձ է կատարվել համագործակցության հնարավոր նոր ուղղություններին, մասնավորապես՝ քննարկվել է Հյուսիս-հարավ ճանապարհային միջանցքի ներդրումային ծրագրի իրականացման շրջանակներում Բարգուշատի թունելի կառուցման աշխատանքները Ֆրանսիայի կառավարության ֆինանսավորմամբ և ֆրանսիական առաջատար շինարարական ու ինժեներական ընկերությունների ներգրավմամբ իրականացնելու հնարավորությունը:
Էրիկ Լոմբարդը, ընդգծելով Հայաստանի հետ տնտեսական կապերի խորացման առանձնակի կարևորությունը, վստահեցրել է, որ ներկայացված ծրագրերը կշարունակեն մնալ Ֆրանիսայի կառավարության ուշադրության կենտրոնում, և անհարժեշտ ջանքեր կգործադրվեն դրանց իրագործման ուղղությամբ:
Կողմերը համաձայնություն են ձեռք բերել առաջիկա քայլերի և համագործակցության հետագա ձևաչափերի վերաբերյալ:
