Քաղաքացիների անհանգստությունը կվերանա, երբ նրանք սկսեն եկամուտների հայտարարագիր ներկայացնել. ՀՀ ֆինանսների նախարարության վարչության պետ

Հայաստանում հայտարարագրման համակարգը գործում է 1995 թվականից: Նոր համակարգն ընդամենն ավելի հասանելի է դարձել: «Արմենպրես»-ի հաղորդմամբ՝ Մեդիա կենտրոնում տեղի ունեցած թեմատիկ քննարկման ընթացքում այս մասին նշեց ՀՀ ֆինանսների նախարարության եկամուտների քաղաքականության և վարչարարության մեթոդաբանության վարչության պետ Օրի Ալավերդյանը:

Ըստ նրա՝ հայտարարագրման համակարգի ներդրման առաջնային նպատակը ՀՀ քաղաքացիների եկամուտների վերաբերյալ համապարփակ տեղեկատվություն հավաքելու մեխանիզմների ստեղծումն է, որը հետագայում պետք է օգտագործվի նաև պետության կողմից իրականացվող սոցիալական աջակցության ծրագրերի իրագործման, դրանց թիրախայնությունն ապահովելու համար:

«Անհրաժեշտ է որ հասկանանք, թե Հայաստանի Հանրապետության յուրաքանչյուր քաղաքացի ինչպիսի եկամտային պրոֆիլ, պորտֆել ունի, որպեսզի ապահովվի պետական սոցիալական աջակցության ծրագրերի թիրախայնությունը: Թերևս, սա է պատճառը, որ հայտարարագրման համակարգի մասնակից են ՀՀ ռեզիդենտ քաղաքացիները, այսինքն՝ մարդիկ, որոնք տարվա մեծ մասը բնակվում են Հայաստանում և հետագայում օգտվելու են կամ հասցեատեր են լինելու ՀՀ աջակցության ծրագրերի»,-նշեց նա:

Օրի Ալավերդյանը հայտնեց, որ հայտարարագրման համակարգը նորույթ չէ Հայաստանի Հանրապետությունում. այն գործում է 1995 թվականից: Նշվեց, որ գործող հարկային օրենսդրությամբ քաղաքացիները, ՀՀ ֆիզիկական անձինք պետք է ներկայացնեն իրենց հարկվող եկամուտների վերաբերյալ հարկային հաշվարկներ ու դրանով վճարեն հարկային գործակալների չհարկված հարկերը: Նոր համակարգն ընդամենը վերափոխվել և տեխնիկապես ավելի հասանելի է դարձրել հայտարարագրման համակարգը:

«Շատ կարևոր հանգամանք է նաև, որ հայտարարագրման նոր համակարգի շրջանակներում ներդրվել է սոցիալական ծախսերի ինստիտուտը, որը ՀՀ հայտարարատու քաղաքացիները պետք է ստանան հայտարարագիր ներկայացնելու արդյունքում:

Սոցիալական ծախսերը երկու ուղղությունով են, որոնցով պետությունը փորձում է գոնե ներդրման փուլերում առկա հնարավորությունների շրջանակներում աջակցել քաղաքացիներին՝ կարևորություն ներկայացնող ուղղություններում կատարվող ծախսերի առումով»,-արձանագրեց բանախոսը:

Նա գտնում է, որ Հայաստանում եկամուտների հայտարարագրման մշակույթի նորույթով է պայմանավորված քաղաքացիներին համակած որոշակի անհանգստությունը: Գործընթացը նորույթ է նաև պետական համակարգի համար՝ այն առումով, որ մեծ զանգված է ներառում: 

«Կարծում եմ, երբ մարդիկ սկսեն հայտարարագիր ներկայացնել, օգտվել համակարգից և դրա սպասարկման համար ձևավորված ենթակառուցվածքից՝ անհանգստությունները շատ չեն լինելու, քանի որ իրականում հնարավոր է 15-20 րոպեում հայտարարագիր ներկայացնել»,-նշեց Օրի Ալավերդյանը:

Ավելի քան 700 հազար մարդ մինչև մայիսի 1-ը պետք է ներկայացնի հայտարարագիր՝ մանրամասնելով վերջին մեկ տարվա ընթացքում իրենց հաշիվներին մուտքագրված գումարի չափը: