3 րոպեի ընթերցում
Ֆրանսիացի ճանապարհորդ և գրող Սիլվեն Տեսոնի հովանու ներքո Défis Humanitaires մարդասիրական կազմակերպությունը Հայաստան է բերել ֆրանկոֆոն ժամանակակից գրականություն՝ 2700 գիրք։ Գրքերն ուսանողների համար են։
«Արմենպրես»-ի հաղորդմամբ՝ ծրագիրն իրականացվում է Syndicat National de l’Edition-ի և մի շարք հրատարակչությունների, ինչպես նաև SPFA կազմակերպության հետ համագործակցության շնորհիվ և Հայաստանում Ֆրանսիայի դեսպանության աջակցությամբ:
«Հայաստանում այսօր մեծանում է ֆրանսերեն սովորող աշակերտների և ուսանողների թիվը, բայց, եթե դասական գրականության գրքերը նրանց սովորաբար հասանելի են, ապա այլ է ժամանակակից ֆրանկոֆոն գրականության դեպքում: Մենք դա բացահայտեցինք Défis Humanitaires (www.defishumanitaires.com) կազմակերպության՝ Հայաստան կատարած առաքելությունների ժամանակ 2022-ի փետրվարին և 2023-ի դեկտեմբերին: Այնուհետև նպատակ դրեցինք գրքերով համալրել Հայաստանի 11 շրջանի 76 հաստատության գրադարանները: Մեզ համար սա մշակութային, ֆրանկոֆոն ու մարդասիրական նախաձեռնություն է»,-կիսվում է կազմակերպության հաղորդագրության մեջ և ընդգծվում, որ Սիլվեն Տեսոնն աջակցել է իրենց և համաձայնել իր հովանու տակ առնել նախաձեռնությունը։ Աջակիցներից է նաև Syndicat National de l’Edition-ի (SNE) նախագահ Վենսան Մոնտանը։
Հայաստանում Ֆրանսիայի դեսպանության օգնությամբ ստեղծվել է տարբեր տարիքային խմբերին հարմարեցված գրքերի ընտրանի՝ 6-ից 18 տարեկանների համար, և SNE-ի կողմից ուղերձ է հղվել Ֆրանսիայի հրատարակչություններին:
Մոտ տասներկու հրատարակչություն դրական է արձագանքել և ուղարկել է 2700 նոր գիրք։ Օվերն Ռոն-Ալպեր շրջանը նույնպես իր աջակցությունն է ցուցաբերել:
Գրքերը հունվարի 20-ին հասել են Հայաստան։ Երևան է եկել նաև պատվիրակությունը, որի կազմում են Սիլվեն Տեսոնը (գրող), Վենսան Մոնտանը (SNE-ի նախագահ), Ալիքս Մոնտանը, Ռենո Լեֆեբվրը (SNE-ի տնօրեն), Անտուան Ագուջյանը (լուսանկարիչ) և Ալեն Բուանեն (Défis Humanitaires-ի նախագահ):
Հունվարի 20-ին պատվիրակությունն այցելել է Հայոց ցեղասպանության հուշահամալիր, որտեղ ծաղկեպսակ է դրել, այնուհետև հանդիպել է մշակույթի փոխնախարարի հետ։ Ավելի ուշ պատվիրակությունը հանդիպելու է Հայաստանում գրահրատարակչության ներկայացուցիչների հետ։
Այնուհետև հանդիպումներ կլինեն ուսուցիչների, աշակերտների և ուսանողների հետ (որոնցից ոմանք բռնի տեղահանվածներ են Լեռնային Ղարաբաղից կամ որ նույնն է՝ Արցախից) SPFA կազմակերպության ֆրանկոֆոն երկու կենտրոններում՝ Երևանում և Գորիսում, ծրագրի մեկնարկը տալու և գրքերի առաջին արկղերը հանձնելու համար Տեղում կգնահատվի հումանիտար գործողության հնարավոր հետագա ընթացքը: