Հարավային Կորեայում քննչական խումբը ձերբակալման օրդեր է պահանջել պաշտոնանկ արված նախագահի համար
1 րոպեի ընթերցում
ԵՐԵՎԱՆ, 30 ԴԵԿՏԵՄԲԵՐԻ, ԱՐՄԵՆՊՐԵՍ: Հարավային Կորեայի նախագահ Յուն Սոկ Յոլի գործը հետաքննող քննչական խումբը նրան ձերբակալելու օրդեր է պահանջել: «Արմենպրես»-ի փոխանցմամբ՝ այդ մասին հաղորդում է Yonhap գործակալությունը։
«Դիմումը ներկայացվել է Սեուլի արևմտյան շրջանային դատարան, խումբը ձերբակալության օրդերը պահանջել է այն բանից հետո, երբ Յուն Սոկ Յոլն անտեսել է հարցաքննության ներկայանալու երեք ծանուցագիրը»,-նշում է գործակալությունը։
Նախագահի ներկայացուցիչն ասել է, որ մտադիր է «պաշտոնական քայլեր» ձեռնարկել՝ ի պատասխան ձերբակալության օրդերի պահանջի։
Դեկտեմբերի սկզբին խորհրդարանը իշխանությունից հեռացրեց նախագահ Յուն Սոկ Յոլին, որից հետո նախագահի պաշտոնակատար դարձավ Հան Դոկ Սուն։ Յուն Սոկ Յոլի նկատմամբ նման քայլի առիթը դարձավ դեկտեմբերի 3-ին երկրում ռազմական դրություն մտցնելու նրա փորձը՝ քաղաքական ընդդիմախոսների դեմ պայքարելու համար։ Այս որոշումը վրդովմունք առաջացրեց երկրի բնակիչների շրջանում, և խորհրդարանն արագորեն քվեարկեց ռազմական դրությունը չեղարկելու օգտին: Արդյունքում Յուն Սոկ Յոլը համաձայնեց չեղարկել իր կարգադրությունը։