398.94
ՀՀ վարչապետի տիկինը ներկա է գտնվել «Հանդիպման լավագույն վայրը` թանգարան» խորագրով կրթական ծրագրին
2 րոպեի ընթերցում
ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Ավետիք Իսահակյանի անվան տուն-թանգարանում անցկացվել է «Հանդիպման լավագույն վայրը` թանգարան» խորագրով կրթական ծրագիրը, որին մասնակցել է ՀՀ վարչապետի տիկին Աննա Հակոբյանը:
Միջոցառումը Ավ. Իսահակյանի անվան տուն-թանգարանի և ԿԱՊԿՈւ (Կրթության առանձնահատուկ պայմանների կարիք ունեցող) ապագա զբոսավարների գործակցության արդյունքն է:
Կրթության առանձնահատուկ պայմանների կարիք ունեցող երիտասարդները սովորում են հայ-հունական պետական քոլեջում` խորացված օտար լեզուների իմացությամբ զբոսաշրջության ֆակուլտետում:
«Արմենպրես»-ի փոխանցմամբ՝ Աննա Հակոբյանի գրասենյակի տարածած հաղորդագրության մեջ նշվում է, որ միջոցառման ընթացքում քոլեջի 3 ուսանողներ հանդես են եկել կարճ դասախոսություններով` թանգարաններ, մշակույթ և մարդու պահանջմունքներ թեմաներով: Երիտասարդները հյուրերին են ներկայացրել նաև իրենց երաժշտական կարողությունները` երգել ու նվագել են լսարանի համար:
«Սա բժշկական թերապիա էր. ամենաթանկ բանը, որ պետք է գնահատենք, մարդկային ռեսուրսն է, որը պետք է օգտագործվի առավելագույն արդյունավետությամբ»,- նշել է հատուկ մանկավարժ Զեմֆիրա Եգանյանը:
Ծրագրի կարևոր նպատակներից է նաև թանգարաններում երիտասարդներին իրենց մասնագիտությամբ աշխատելու հնարավորություն ստեղծելը:
Վարչապետի տիկինը միջոցառման պաշտոնական հատվածից հետո շփվել է երիտասարդների և նրանց ծնողների հետ, շնորհակալություն հայտնել հիանալի դասախոսությունների ու միջոցառման համար:
Միջոցառմանը հաջորդել է կարճ շրջայց թանգարանում:
Բաժանորդագրվեք մեր ալիքին Telegram-ում