2 րոպեի ընթերցում
ԵՐԵՎԱՆ, 9 ԴԵԿՏԵՄԲԵՐԻ, ԱՐՄԵՆՊՐԵՍ: Հալեպում իրավիճակը գրեթե նույնն է, և փորձ է կատարվում բնական կյանք առաջնորդել քաղաքը:
Այս մասին «Արմենպրես»-ի թղթակցի հետ զրույցում հայտնեց Սիրիայի խորհրդարանի հայազգի պատգամավոր Մարիա Գաբրիելյանը:
«Քիչ առաջ նշանակեցին անցումային շրջանի վարչապետին, որպեսզի ինքն էլ իր հերթին կառավարություն ձևավորի: Սա, երևի, առաջին քայլն է՝ օրինական կառավարություն ունենալու:Շատ դրական երևույթ էր, որ գործող վարչակազմը շարունակեց կառավարումը մինչև անցումային շրջանը:Հետևաբար՝ սա պետական կառույցներն ու ենթակառույցներն օրինավոր, անցնցում հանձնելու ապահով, լավ քայլ էր և փոքր-ինչ վստահություն ներշնչեց: Արդեն այսօր, անցումային շրջանի կամ ինչպես, կարծեմ, նշել են Հայրենիքի փրկության մարմին է ստեղծվել»,-ասաց Գաբրիելյանը:
Անդրադառնալով Հալեպի ռազմական կառավարման պատասխանատուների հետ հայ և քրիստոնյա համայնքապետների հանդիպմանը, պատգամավոր նշեց, որ ազգային փոքրամասնությունների անվտանգության երաշխիքներ արդեն տրվել են, իսկ այդ հանդիպումն ու քննարկումներն ընթացել են համագործակցելու, աշխատանքները համակարգելու մասին, որի շուրջ համաձայնություն է ձեռք բերվել:
Խոսելով Հալեպում առկա կենցաղային խնդիրներից, Գաբրիելյանը տեղեկացրեց, որ ջրամատակարարումը վերակագնվել է, սակայն էլեկտրամատակարարումը շարունակվում է սահմանափակ ռեժիմով՝ օրական երկու ժամ տևողությամբ:
Նրա խոսքով՝ չնայած քաղաքում սննդամթերքի պակաս չկա, սակայն բնակիչները դժվարությունների են բախվում նկատվող գնաճի պատճառով: