368.53
Տիգրան Մկրտչյանն ընդգծել է Ուղղափառության միջխորհրդարանական վեհաժողովի կողմից քրիստոնեական հուշարձանների պահպանության կարևորությունը
1 րոպեի ընթերցում
ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ։ Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը հանդիպել է Ուղղափառության միջխորհրդարանական վեհաժողովի գլխավոր քարտուղար, Հունաստանի խորհրդարանի անդամ Մաքսիմոս Խարակոպուլուսի հետ։
Ինչպես «Արմենպրես»-ը տեղեկանում է Հունաստանում Հայաստանի դեսպանության տարածած հաղորդագրությունից, հույն խորհրդարանականը շնորհակալություն է հայտնել ուղղափառ խորհրդարանականների միջխորհրդարանական կառույցում Հայաստանի խորհրդարանական պատվիրակության երկարամյա և ակտիվ մասնակցության համար և վստահություն հայտնել, որ այս համագործակցությունը կշարունակի լինել բովանդակալից և արդյունավետ՝ հանուն խաղաղության և ընդհանուր քրիստոնեական արժեքների պահպանման:
Դեսպան Մկրտչյանն, անդրադառնալով Ուղղափառության միջխորհրդարանական վեհաժողովի գործունեությանը, ընդգծել է վերջինիս կողմից քրիստոնեական հուշարձանների պահպանության, դրանց ինքնության աղավաղման կամ ոչնչացման վերաբերյալ միջազգային իրազեկվածության բարձրացման կարևորությունը։
Կողմերը պայմանավորվել են համագործակցել գալիք տարվա սկզբին Երևանում կազմակերպության պատվիրակության այցի նախապատրաստման ուղղությամբ։
Բաժանորդագրվեք մեր ալիքին Telegram-ում