2 րոպեի ընթերցում
ԵՐԵՎԱՆ, 18 ՆՈՅԵՄԲԵՐԻ, ԱՐՄԵՆՊՐԵՍ: Աբխազիայի վարչապետ Ալեքսանդր Անկվաբը նոյեմբերի 18-ին հայտարարել է, որ հանրապետությունում ապաարգելափակվել է գերատեսչությունների աշխատանքը։
Ինչպես հաղորդում է «Արմենպրես»-ը, վկայակոչելով «ՌԻԱ Նովոստի»-ն, ավելի վաղ երկրի մշակույթի նախարար Դինարա Սմիրը հայտնել էր, որ զինված մարդիկ թույլ չեն տալիս հանրապետության նախարարների կաբինետի աշխատակիցներին մուտք գործել իրենց աշխատավայր։
«Գրեթե բոլոր նախարարություններն ու գերատեսչությունները կատարում են իրենց ծառայողական պարտականությունները։ Նրանց աշխատանքը գրեթե արգելափակված էր, մինչդեռ անհրաժեշտ էր կարճ ժամանակում ապաարգելափակել այն, որպեսզի կատարվեին վճարումները, տրվեին կենսաթոշակները, նպաստները և այսօրվա իրավիճակի համար շատ կարևոր այլ գործողություններ իրականացվեին։ Մինչ ճաշը իրավիճակը կայունացավ։ Հիմա նման խնդիրներ չկան, և հուսով ենք, որ վաղը նման խնդիրներ չեն լինի, քանի որ դա լուրջ վնաս է պատճառում և ավելի է խորացնում մարդկանց շատ վատ տրամադրությունը»,- նշել է վարչապետը։
Աբխազիայում իշխանությունների և ընդդիմության միջև առճակատումը սկսվել է Ռուսաստանի հետ ներդրումային համաձայնագրի պատճառով։ Նոյեմբերի 15-ին Աբխազիայի խորհրդարանը պետք է քննարկեր ՌԴ իրավաբանական անձանց կողմից երկրում ներդրումային նախագծերի իրականացման մասին համաձայնագրի վավերացման հարցը։ Նիստը չեղարկվել է այն պատճառով, որ պատգամավորները չեն կարողացել հաստատել դրա օրակարգը։ Ընդդիմությունը պահանջել է խորհրդարանի կրկնական գումարում հարցի լիակատար բացառման համար։ Ավելի ուշ ընդդիմությունը պահանջել է Աբխազիայի նախագահ Ասլան Բժանիայի հրաժարականը։ Նա իր հերթին հայտարարել է, որ կշարունակի աշխատել և հանրապետության քաղաքացիներին կոչ է արել չտրվել սադրանքների: