1 րոպեի ընթերցում
ԵՐԵՎԱՆ, 12 ՆՈՅԵՄԲԵՐԻ, ԱՐՄԵՆՊՐԵՍ։ ՆԱՏՕ-ի գլխավոր քարտուղար Մարկ Ռյուտեն նոյեմբերի 13-ին Բրյուսելում դաշինքի կենտրոնակայանում կընդունի ԱՄՆ-ի պետքարտուղար Անտոնի Բլինքենին և նրա հետ համատեղ կանցկացնի Հյուսիսատլանտյան խորհրդի նիստ։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին ասված է կազմակերպության մամուլի ծառայության հաղորդագրության մեջ։
«Գլխավոր քարտուղարը ՆԱՏՕ-ի կենտրոնակայանում կընդունի ԱՄՆ պետքարտուղարին, որը կմասնակցի Հյուսիսատլանտյան խորհրդի շրջանակում դաշնակիցների հետ հանդիպմանը»,- ասված է հաղորդագրության մեջ։
Չորեքշաբթի օրերին ՆԱՏՕ-ի կենտրոնակայանում ավանդաբար անցկացվում են Հյուսիսատլանտյան խորհրդի նիստեր՝ կազմակերպության անդամ երկրների մշտական ներկայացուցիչների հետ։ Ավելի վաղ ԱՄՆ պետքարտուղարությունը հայտնել էր, որ Բլինքենը պատրաստվում է քննարկել Ուկրաինային տրամադրվող օգնությունը Բրյուսել կատարած այցի ժամանակ։