Թրամփը հայտարարել է, որ իր նպատակը աշխարհում պատերազմներին վերջ դնելն է

ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: ԱՄՆ նախագահի հանրապետական թեկնածու Դոնալդ Թրամփը, որն, ըստ Fox News-ի կանխատեսման, արդեն ապահովել է ընտրություններում հաղթանակը, հայտարարել է, որ մտադիր է դադարեցնել պատերազմներն աշխարհում։ 

«Արմենպրես»-ի փոխանցմամբ՝ այդ մասին Թրամփն ասել է իր հաղթանակի կանխատեսումից հետո Ֆլորիդայում աջակիցների առջև ելույթի ժամանակ։

«Ես չեմ պատրաստվում պատերազմներ սկսել, ես, ընդհակառակը, պատրաստվում եմ վերջ տալ պատերազմներին», - ասել է Թրամփը:

Նրա խոսքով՝ իր առաջին նախագահական ժամկետի չորս տարվա ընթացքում պատերազմներ չեն եղել։ 

«Մենք պատերազմներ չենք ունեցել, չորս տարի մենք պատերազմներ չեն ունեցել, եթե հաշվի չառնենք, որ պարտության մատնեցինք «Իսլամական պետությանը»», - ասել է Թրամփը:

ԱՄՆ նախկին նախագահ Դոնալդ Թրամփը հայտարարել է ընտրություններում իր հաղթանակի մասին այն բանից հետո, երբ Fox News-ը կանխատեսել է, որ նա հաղթել է ԱՄՆ փոխնախագահ, դեմոկրատական թեկնածու Քամալա Հարիսին։ Ըստ Fox News-ի՝ Թրամփն ապահովել է ընտրիչների 277 ձայն՝ անհրաժեշտ 270-ից։ Ըստ այլ լրատվամիջոցների տվյալների՝ Թրամփն ապահովել է ընտրիչների 267 ձայն, Հարիսը՝ 224։